ދައުލަތް ދައުލަތަކަށް ވަނީ އެ ދައުލަތެއްގައި ހަމަ ހަމަކަމާ އިންސާފުން ކަންކަން ގާއިމުކުރެވޭ ނަމައެވެ. އެހެންކަމުން އެތަނެއްގައި އިންސާފުގެ ހަމަ ގެއްލިއްޖެ ނަމަ ދެން ފަހެ އެ މުޖުތަމައެއް އެވަނީ ފަސާދަވެފައިކަން ކަށަވަރެވެ.

އާދޭހެއެވެ. ދައްކަން މިއުޅެނީ ރާއްޖޭގެ އިންސާފާ ހަމައިގެ ވާހަކައެވެ. ގައުމުގެ ޝަރުއީ ނިޒާމު ތަންފީޒުކުރުމުގެ މުގުލުގައި ތިބި ބައެއް ފަރާތްތަކުގެ ހަމަ އޮތް ހިސާބުގެ ވާހަކައެވެ.

ހާއްސަ އިމްތިޔަޒްތަކާއި އިހުތިޔާރުތަކެއް ދީފައި ހުންނަ މީހަކަށް ޕީޖީ ވީ ނަމަވެސް އެއީ އެއްވެސް ޙާލެއްގައި އެކަމުގެ ނާޖާއިޒު ފައިދާ ނަގަން ލިބޭ ލައިންސަސެއް ނޫނެވެ. އެއީ އަދުލުވެރިކަމާއި އިންސާފާއި ހަމަހަމަކަން ގާއިމުކުރުމަށް ދިފައި އޮންނަ ބާރުތަކެކެވެ.

ޖިނާއީ އަދުލުގެ ނިޒާމްގެ މައިބަދަކަމުގައި ޕީޖީ ވީ ހިނދު ތަހުގީގާއި ޝަރީއަތް ގުޅުވާދޭ ފާލަން ރެނދު ލައިފިނަމަ މުޅި އިންސާފުގެ ނިޒާމަށް އެކަމުގެ ލޮޅުން އަރާނެކަން ޔަގީނެވެ.

ދައުލަތް ހަރާބުވެ މުޅި ދައުލަކީ ކުށުގެ އަމަލުން ތަތްތެޅެފައިވާ ދައުލަތަކަށް ބަދަލުވެގެން ދިއުމަކީ އެ ދަުއލަތެއް ތެރޭގައި ތިބޭ އިންސާފަށް ލޯބި ކުރާ އެއްވެސް މީހަކު ބޭނުންވާނެ ގޮތެއް ނޫނެވެ. އެހެންކަމުން ހަމަ ހަމަ ކަމާ އިނސާފު ނެތިއް ދިއުމަކީ އެ ގައުމެއްގެ މިސްރާބު ފާލުން ނެއްޓިއްޖެކަމުގެ އެއް ހެއްކެވެ.

ކުޑަ ކުޑަ މިސާލެކެވެ. އެމްއެމްޕީއާރުސީގެ މައްސަލައިގައި ހިމެނޭ ކަމަށް ރިޔާސީ ކޮމިޝަނުން ނެރުނު ރިޕޯޓުގައި ހިމެނޭ 300 އެއްހާ މީހުންގެ ތެރެއިން ދައުވާ އުފުލާ މައްސަލަތައް ބަލާ ހުކުމް އައީ މަދު ބަޔަކަށެވެ. އެތަނުން އެއް ބަޔަކު ވަކި ސަރުކާރާކާ އެކު ހެދި، ގާނޫނު ނުދަންނަ ޕްލީބާގެއިންއަކާ އެކު ކުށުން މިނިވަންވެ ތިބިއިރު ދެން ހުންނެވި ބޭފުޅާ ކޮންމެ ފަހަރަކުވެސް މައުސޫމުކަން ސާބިތުކުރެއްވީ ކޯޓުންނެވެ.

އާދޭހެވެ. މި ދައްކަނީ ރައީސް އަބްދުﷲ ޔާމީންއާ މެދު ކަންކުރި ގޮތެވެ. އެގޮތުން ބަލާއިރު މިއަދު ހުރީ ދައުލަތުގެ ޕްރޮސެކިއުޓަރ ޖެނެރަލެކޭ ބުނަން މަޖްބޫރުވާ ފަދަ ހާލަތަކަށް ކަންކަން ގޮސްފައިވާ މަންޒަރު އެބަ ފެނެއެވެ. މިހެން ބުނަން މަޖްބޫރުކުރުވަނީ ޚުދު ޕީޖީގެ އަމަލުތަކެވެ.

ލާދީނީ ރިޕޯޓު ނެރުނު އެމްޑީއެންގެ އެއް ފައުންޑަރ ހުސެއިން ޝަމީމު ދައުލަތުގެ ޕީޖީގެ މަގާމުގައި މި ދައުރު ނިމެންދެން ވެސް ބަހައްޓަން ރައީސް އޮފީހުން ޑީލެއް ހަދާފައިވާ ކަމަށް އަޑުގަދަ ވީ މީގެ ކުޑަ ދުވަސްކޮޅެއް ކުރިންނެވެ. އަދި އެޑީލްގެ ވާހަކަ ނުހިނދެނީސް ދެން އިވުނީ އެމްއެމްޕީއާރުސީގެ ޚިޔާނާތުގެ ތެރެއިން މައްސަލައެއްގެ ދައުވާ އުފުލާ ޝަރީއަތް ހިނގަމުން ދަނިކޮށް އަހުމަދު ނިހާނު ހުސެއިން މަނިކުގެ މައްސަލަތައް އަނބުރާ ދައުލަތުން ގެންދިޔަ ވާހަކައެވެ. ޔައުނީ ޕީޖީ އަމިއްލައަށް އެ ދައުވާތައް ގެންދިޔައީއެވެ. މިއީ ކުރިން ބުނެވި ދިޔަ ޑީލުގެ އަސަރޭ ރަށު ތެރެއިން ކިޔާތި އަޑު އިވެއެވެ.

ރައްޔިތުންގެ މަޖިލިސްގެ މެންބަރުކަން ކޮށްފައިވާ އަހުމަދު ނިހާނު ހަސަން މަނިކުގެ މައްޗަށް ދައުވާ ކުރުމަށް 14 ޑިސެންމބަރ 2020ގައި ޕްރޮސިކިއުޓަރ ޖެނެރަލަށް ފޮނުވިއެވެ. ދައުވާ ކުރަން ފޮނުވިއިރު އޭނާގެ ޕާސްޕޯޓްވެސް އޮތީ ހިފަހައްޓާފައެވެ. ކުރާނެ ވަރަކަށް ދިރަސާކުރުމަށް ފަހު 6 މައްސަލައެއްގައި ނިހާނާ ދެކޮޅަށް ދައުލަތުން ދައުވާ ކުރިއެވެ. ނިހާނާ ދެކޮޅަށް ދައުލަތުން ދައުވާކުރީ 29 ޑިސެންބަރ 2020ގައެވެ.

ނިހާނުގެ މައްޗަށް ކުރިހާ ދައުވާއަކީ ރިޝްވަތު ހިފުމުގެ ކުށުގެ ތިން ދައުވާއާއި މަނީ ލޯންޑްރިންގގެ ކުށުގެ ދައުވާއަކާއި ރިޝްވަތު ލިބިދިނުމަށް އެދުމުގެ ކުށުގެ ދެ ދައުވާއެވެ. ދައުވާތަކާއި އެކު ޕްރޮސިކިއުޓަރ ޖެނެރަލް ވަނީ ނިހާނު ކުށްކޮށްގެން ހޯދާފައިވާ ފައިސާ އަދި އެއާ އެއްކޮށްފައިވާ މުދާލާއި ފައިސާ ދައުލަތަށް ނަގައިދިނުމަށް ކޯޓުގައި އެދިފައެވެ. ޝަރީއަތް ނިމެންދެން ނިހާނުގެ ޕާސްޕޯޓް ވެސް އޮތީ ހިފަހައްޓާފައެވެ.

ނިހާނުގެ މައްޗަށް ދައުލަތުން ކުރި ދައުވާތަކުގެ ޝަރީއަތް ބޭއްވެމުން ނުބޭއްވެމުން ގޮސް ޝަރީއަތުގެ ހުކުމަކާ ނުލާ ހުސްވި ޖޫން މަހު ނިހާން ބޯކިރުކޮޅަކަށް ވެއްޖެއެވެ. ނިހާނުގެ މައްސަލަތައް އަނބުރާ ނެގި ދުވަހު ނޫން އަނެއް ދުވަހު ނިހާނު ހުރީ ދިވެހި ދައުލަތުގެ ގާނޫނު ހަދާ ބާރުގެ އިދާރާގެ އިސްވެރިއަކަށެވެ. މިއީ އިއްތިފާގެއް ނޫނެވެ. މިއި ބޮޑު ރޭވުމެެއްކަން ޔަގީނެވެ. ތަނެއް ފަސާދަވާނީ މިހާކަންހާ ވަރަށެވެ.

ނިހާނު، މައުސޫމް ކުރުމުގެ ބަހަނާއަކަށް ޕީޖީން ދެއްކި ބަހަނާއަކީ އެމްއެމްޕީއާރުސީގެ މައްސަލައިގައި ރައީސް ޔާމީނުގެ މައްސަލަ ނިމުނު ގޮތުން ނިހާނުގެ މައްޗަށްވެސް ކުށްސާބިތު ކުރެވޭނެ ކަމަށް ޕްރޮސިކިއުޓަރ ޖެނެރަލަށް ގަބޫލު ނުކުރެވުމެވެ. ކޮށްގެން އުޅުނީ ސާބިތު ނުހިފޭނެ ދައުވާތަކެއްކަން ޕީޖީއަށް އެނގުނީ ތިން އަހަރު ފަހުންތޯ މިއީ މިހާ ހިސާބުން އުފެދޭ ސުވާލެކެވެ. ނޫނީ މިއީ ވަކި މީހަކަށް މަގާމެއް ދޭންވީމާ އަމިއްލަ މަގާމުވެސް ދިފާއުކުރަމުން ޖެހި ޗައްކަރެއް ނޫން ބާއެވެ؟ ވާސަރީވާއެވެ.

ނިހާންގެ މައްސަލަ ސާބިތު ނުވާނެކަމަށް ޕީޖީއަށް ގަބޫލުކުރެވުނުކަމަށްވާއިރު ރައީސް ޔާމީންގެ މައްސަލަތައް ގައިމު އަދިވެސް ދަށު ކޯޓުގައި އެބަ ހުއްޓެވެ. ހަމަ އެއް ހެކިތަކެއްގެ މައްޗަށް ބިނާކޮށެވެ. އެހެންކަމުން މިވާ ގޮތް ނިކަން ރަގަޅަށް ލޯ ހުޅުވާ ބަލާލީމާ އެބަ ފެނެއެވެ.

މިއުޅެނީ ވަކި މީހަކު އެކަމުގެ ތެރޭގައި ފްރޭމުކޮށްފައި ބަހައްޓަންށެވެ. ނޫންނަމަ އެމީހެއްގެ މައްސަލައެއްގައި ކޮށްފައި އޮތް ހުކުމަކަށް ރިއާޔަތްކޮށް އެހެން މީހުންގެ މައްސަލަތައް އަނބުރާ ގެންދާއިރު އެ އިޝާރާތްކުރާ މައްސަލައިގައި ދައުވާ ލިބުނު ފަރާތަށް ކުރާ އެހެން ތުހުމަތުތަކުގެ ދައުވާތައް އަނބުރާ ނުގެންދަންވީ ފަހެ ކީއްވެގެން ހެއްޔެވެ؟

ހަގީގަތުގައި ވެސް މިގައުމެއް ނެތެވެ. ދައުލަތުގެ މިސްރާބު ހުރި ދިމާއެއް އެނގޭ މީހެއް ނެތެވެ. މިވަރުން މި ކުރާ ދަތުރު އަމާން ވާނެބާއެވެ؟ ދިވެހީންގެ ރާއްޖެގެ މިސްރާބު ހުރީ އަނގަވަތަށް ކަމުގައި ނުވިއްޔާ ކިތަންމެހާ ވެސް ރަގަޅެވެ.