ޚަރަދު ކުޑަކުރުމުގެ ސިޔާސަތު އިއުލާންކުރުމަށް ފަހު ރައީސް މުހައްމަދު މުއިއްޒު ގެންދަވަނީ މަގާމުތަކަށް މީހުން އައްޔަންކުރަމުންކަން އަނެއްކާވެސް ހާމަވެއްޖެއެވެ.

އެގޮތުން ދައުލަތުގެ ބަޖެޓުން ބޮޑު ހަރަދެއްކޮށްގެން ފަތުރުވެރިކަން އިސްތިހާރުކުރާ ކުންފުނި، އެމްއެމްޕީއާރުސީގެ ބޯޑު މެންބަރުކަމަށް ދެ ބޭފުޅަކު ޕީސީބީއިން ވަނީ އައްޔަންކޮށްފައެވެ.

ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑުން އެކްސްގައި ކުރި ޕޯސްޓެއްގައި ހާމަކޮށްފައިވާ ގޮތުގައި އެމްއެމްޕީއާރުސީގެ ޑިރެކްޓަރުންގެ ބޯޑުގެ މެންބަރުކަމަށް އައްޔަންކުރެއްވީ އއ. އުކުޅަސް، އައްސޭރި އަބްދުއްސަމީއު އިމާދު އަދި ދަފްތަރު ނަންބަރު 12480 އައިޝަތު ހަމީދުއެވެ. މި ދެބޭފުޅުން އެ މަގާމަށް އައްޔަންކުރައްވާފައިވަނީ ޖުލައި 4 ވަނަ ދުވަހުއެވެ.

ސަރުކާރުގެ ޚަރަދުތައް އިންތިހާއަށް އިތުރުވެފައިވާއިރު، ޚާއްސަކޮށް ރިކަރަންޓު ޚަރަދަށް ދައުލަތުން ބޮޑު ހޭދައެއް ކުރާކަން ހިސާބުތަކުން ހާމަވާއިރު ދައުލަތުގެ ޚަރަދުތައް ކުޑަކޮށް އިގްތިސޯދީ އިސްލާހީ ފިޔަވަޅުތަކެއް ނާޅައިފިނަމަ ރާއްޖެ ބަނގުރޫޓުވާނެކަމުގެ އިންޒާރު ދުނިޔޭގެ މާލީ އިދާރާތަކުން ދީފައިވެއެވެ.

ނަމަވެސް ރައީސް މުއިއްޒު ހުރިހާ ކަމެއްގަިއ ގެންގުޅުއްވާ އުސޫލުން ޚަރަދު ކުޑަކުރައްވަން ފިޔަވަޅުތަކެއް އަޅުއްވާކަމަށް ވިދާޅުވުމަށް ފަހު ގެންދަވަނީ އެކަމާ ދިމާ އިދިކޮޅަށް އަމަލުފުޅުތައް ބަހައްޓަވަމުންނެވެ.

އެމްއެމްޕީއާރުސީގެ ބޯޑަށް ދެ ބޭފުޅަކު އައްޔަންކުރެއްވިއިރު އެ ދޭފުޅުންނަށް މުސާރައިގެ ގޮތުގައި ކޮންމެ ބޭފުޅަކަށް 9،800 ރުފިޔާ މަހެއްގެ މައްޗަށް ލިބޭނެއެވެ.