މާލޭގައި ގުރޫޕަކުން މީހަކު ރަހީނުކޮށް އެމީހާގެ އިނގިއްޔެއް ބުރިކޮށްލި ތިން މީހަކު ޝަރީއަތް ނިމެންދެން ބަންދުކޮށްފިއެވެ.

މި މައްސަލައިގެ ތުހުމަތުގައި ކްރިމިނަލް ކޯޓަށް ތިން މީހަކު ހާޒިރުކޮށްފައިވާއިރު އޭގެ ތެރޭގައި ހިމެނެނީ 23 އަހަރުގެ ދިވެހި ފިރިހެނަކާއި، 21 އަހަރުގެ ދިވެހި ފިރިހެނަކާއި، 18 އަހަރުގެ ދިވެހި ފިރިހެނެކެވެ.

ތިން މީހުންގެ ބަންދާމެދު ގޮތެއް ކަނޑައަޅަން އިއްޔެ ކޯޓަށް ހާޒިރުކުރުމުން ތިން މީހުންގެ މައްޗަށް ވަނީ ވަކިވަކިން އަމުރު ނެރެފައެވެ. އެ އަމުރުތަކުގައި ބުނެފައި ވަނީ، މި މައްސަލައިގައި އަނިޔާ ލިބުނު ފަރާތަކީ އެ މީހުންނާއެކީ މަސައްކަތް ކުރި މީހެއް ކަމަށެވެ. 

ތިން މީހުން ވެސް ކޯޓުގައި ބުނެފައި ވަނީ އެމީހާ ރަހީނުކޮށްފައި ނުވާ ކަމަށެވެ. އަދި އެމީހާގެ އިނގިލި ވެސް ބުރިކޮށްލާފައި ނުވާ ކަމަށެވެ. އެމީހާގެ އިނގިލި ބުރިވީ ޕަވަޓޫލެއް ބޭނުންކުރަނިކޮށް ކަމަށް ވެސް ބުނެފައިވެއެވެ.

ތިން މީހުންނަށް ފުލުހުން ކުރާ ތުހުމަތުތަކަކީ ތޫނު ހަތިޔާރު ބޭނުންކޮށްގެން މާރާމާރީ ހިންގުމާއި، މީހެއްގެ ގައިގައި ޖެހުމާއި ހުއްދަ ނޫން ގޮތެއްގައި މީހަކު ހިފަހައްޓައިގެން ގެންގުޅުމުގެ ތުހުމަތެވެ.

ހައްޔަރުކުރި އެކަކަކީ އަނިޔާ ލިބުނު މީހާއާ އެއް ތަނެއްގައި މަސައްކަތް ކުރާ މީހެއް ކަން ކޯޓު އަމުރުން އެނގެއެވެ.

ސީސީޓީވީ ފުޓޭޖުގެ ވީޑިއޯ ސްނިޕްޝޮޓްތަކަކާއި އަނިޔާ ލިބުނު ފަރާތަށް ލިބިފައިވާ އަނިޔާ ފެންނަ ފޮޓޯއަކާއި ފުލުހުންގެ އިންޓެލިޖެންސް ރިޕޯޓެއް ޝަރީއަތަށް ފުލުހުން ހުށަހަޅާފައިވެއެވެ.

މި ތިން މީހުން ވެސް ވަނީ ޝަރީއަތް ނިމެންދެން ބަންދު ކޮށްފައެވެ. ސަބަބެއް ކަމަށް ބަޔާންކޮށްފައި ވަނީ، އަނިޔާ ލިބުނު ފަރާތަށް އަނިޔާ ދިނުމުގައި ތިން މީހުން ވެސް އިސްދައުރެއް އަދާކޮށްފައިވާ ކަމާއި، ޖިސްމާނީ އަނިޔާކޮށްފައިވާ ކަމުގެ ހެކި ފުލުހުން ހުށަހަޅާފައިވާ ކަމެވެ. އަދި، ޖަމާއަތް ހަދައިގެންނާއި އިންތިޒާމްވެ، ދިގުދެމިގެންދާ ގޮތަށް ކުށުގެ އަމަލު ހިންގާފައިވާ ކަމަށް ބެލެވޭ ހެކިވެސް ހުށަހަޅާފައިވާ ކަމަށް އަމުރުގައިވެއެވެ.