ގައުމު ހިންގަން ނޭނގި ފިނި ކޮޓަރީގައި ތިބެ ގައުމު ބަނގުރޫޓްކޮށްލީ ކޮންބައެއްކަން ރައްޔިތުންނަށް އެނގޭތީ ރައްޔިތުން ނުކުމެ އެމްޑީޕީގެ ވެރިކަން ނިމުމަކަށް ގެނައީ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވުމާ ގުޅިގެން ފާޑުކިޔުން އަމާޒުވެއްޖެއެވެ.
ކުރީގެ ޚާރިޖީ ވަޒީރު އަބްދުﷲ ޝާހިދު ޓެގްކޮށް އަދުރޭ އެކްސްގައި ކުރި ޕޯސްޓެއްގައި ވިދާޅުވެފައިވަނީ ރައީސް ޑރ.މުޢިއްޒުގެ ސަރުކާރަކީ ރައްޔިތުންގެ އިޙްސާސްތައް ދަނެގެން ހިންގާ ރައްޔިތުންގެ ސަރުކާރެއްކަމަށެވެ. އަދި ލާމަރުކަޒީ ނިޒާމުގެ ފޮނިމީރުކަން ރައްޔިތުންނަށް ހޯދައިދޭނީ ރައީސް ޑރ.މުޢިއްޒުގެ ސަރުކާރުންކަމަށް އަދުރޭ ވިދާޅުވެފައިވެއެވެ.
އަދުރޭގެ މި ވާހަކައަށް ރައްދު ދިން ބައެއް މީހުން ބުނެފައިވަނީ މި ސަރުކާރު ގެނައީ ތިމަންނާމެންނަށް ވާނެއޭ ބުނުމުން ކަމަށާ އެހެންކަމުން ކުރީ ސަރުކާރުގެ ވާހަކަ ނުދައްކާ ގައުމާ ރައްޔިތުންނަށް ފައިދާ ހުރި ގޮތެއް ހޯދަން މަސައްކަތްކުރުން މާ ރަގަޅު ކަމަށެވެ.
މީގެ އިތުރުން ރައްޔިތުން މިހާރު ތިބީ ރައީސް މުއިއްޒުއާ އަދި ދެންވެސް ތިބި ބަޔަކާ ގައުމުގެ ތަޚުތު ހަވާލު ކުރެވުނު މޮޔަ ހީވެފައި ކަމަށާ ވެރިކަން މަގުމަތިން ވެއްޓިއްޖެ ނަމަ ލަދުގަންނަން ޖެހޭނީ އަދުރޭމެން ކަމަށްވެސް ބުނެފައިވެއެވެ.
ހަމައެހެންމެ ރައީސް މުއިއްޒަށް ގައުމު ހިންގަން ނޭނގި ކަންކަން މެނޭޖުކުރަން ނޭނގުމުން ކުރި ސަރުކާރާ ޖާމިނުކޮށް ދޮގު މައުލޫމާތު ފަތުރާ ރައްޔިތުންނަށް އޮޅުވާލަމުން ދާ ކަމަށް ވެސް ވަނީ ބައެއް މީހުން ވަނީ ތުހުމަތުކޮށްފައެވެ.
އަދުރޭއަށް ރައްދު ދެމުން ޕޯސްޓުކުރި އެހެން ފަރާތަކުން ވަނީ ޤައުމު ހިންގަން އެނގުމަކީ ތިމާގެ އަނބިންނާއި ދަރިންނާއި އެ ދަރިންގެ އަނބިންނާ ފިރިން އަދި އާއިލާގެ އެންމެނަށް ކުފޫ ހަމަނުވާ މަގާމުތަކަށް އައްޔަންކޮށް ދައުލަތުގެ ބައިތުލްމާލު ލޫޓުވުންތޯ އަހާ ސުވާލުކޮށްފައެވެ.
ގައުމު ހިންގަން އެނގުމަކީ ކުދި އަދި މެދު ފަންތީގެ ވިޔަފާރިތައް ކުރަމުންދާ ފަރާތްތަކުގެ ވިޔަފާރި ތެރެއަށް ސަރުކާރުން އަތްބާނާ އެ ވިޔަފާރިތައް ނައްތާލުންތޯވެސް އެމީހާ ވަނީ ސުވާލުކޮށްފައެވެ. ގައުމު ހިންގަން އެނގުމަކީ ދައުލަތަށް ވަންނަ އާމްދަނީން ތިންބައިކުޅަ ދެބައި އަންބޮނޑިއަށް މަހާލުންތޯ އަހާ އެމީހާ ވަނީ ގައުމު ހިންގަން އެނގުމަކީ އުޑެއް ބުޑެއް ނުދަންނަ ކަޗޯރުންނަށް ހާހުން ދެހާހުން ސިޔާސީ މަގާމުތައް ދިނުންތޯވެސް އަހާފައެވެ.
ހަމަ އެހެންމެ ގައުމު ހިންގަން އެނގުމަކީ ބޭރު ފައިސާއިން އުފެއްދުންތެރިކަން އިތުރުނުވެ އެ ފައިސާ ތިމާމެންގެ އަމިއްލަ ކަންކަމަށް ޚަރަދުކޮށް ހުސްކޮށްލުންތޯއާ ގައުމު ހިންގަން އެނގުމަކީ ގައުމުން ބޭރުގައި ކިޔަވަން ތިބި ދަރިން ބިކަކޮށްލުންތޯވެސް އަހާފައިވެއެވެ. ގައުމު ހިންގަން އެނގުމަކީ އުމްރާނީ ތަރައްގީގެ އެއްވެސް ކަމެއްނުކޮށް ފިނި ކޮޓަރީގައި ތިއްބަވައިގެން ޔޫޓިއުބުން ތަމަޅަ ފިލުމު ބެލުންތޯވެސް އަހާ އެމީހާވަނީ އަބްދުﷲ ޝާހިދުއަށް ފާޑުކިޔޭވަރުގެ ފެންވަރު އަދުރޭގެ ކިބައިގައި ނެތްކަމަށެވެ.
އެމްޑީޕީއަށް ވެރިކަން ކުރަން ނޭނގޭ ކަމަށް އަދުރޭ ބުނުމުން އޭނާއަށް ފާޑުކިޔުން އަމާޒުވެގެން ގޮސްފައިވާއިރު ގިނަ ބަޔަކުވަނީ އޭނާއަކީ މަގާމަށް ކުފޫ ހަމަނުވާ މީހެއް ކަމަށް ވެސް ބުނެފައެވެ.
