ކޮންމެ ސަރުކާރަކުން ވެސް ވެރިކަމަށް އަންނަނީ މޮޅެތި، ބޮޑެތި ޕްލޭންތައް ހަދައިގެން އެ ޕްލޭންތަކާއި އެއްގޮތައް ކަންކަން ކުރައްވާނެ ކަމުގެ ވައުދާއެކުގައެވެ. ހަމަ އެ ބީދާއިން، މި ސަރުކާރުވެސް ވެރިކަމާ ހަވާލުވީ "ޕްލޭން" ކޮށްގެން ކަންކަން ކުރައްވާނެ ކަމަށް ވިދާޅުވުމަށްފަހުގައެވެ.

ޕްލޭންތަކުގެ ތެރޭގައި ބޮޑަށް މި ދެކެވެނީ ރާއްޖޭގެ އިގްތިޞާދީ ހާލަތު ރަނގަޅު ކުރުމުގެ ވާހަކަތަކެވެ. މިކަން ކުރައްވަން ޕްލޭންތަކެއް ހުރި ކަމަށް އަދުގެ ރައީސް ޑރ މުހައްމަދު މުއިއްޒު ވިދާޅުވީ ކިތައް ފަހަރު ކަމެއް ވެސް އަޅުގަނޑަކަށް ނޭނގެއެވެ. އެގޮތުން އިގްތިޞާދީ ހާލަތު ރަނގަޅު ކުރުމަށް ކައިރި ރަހުމަތްތެރި ގައުމުތަކުން "ގްރީން" ސިގްނަލް ދީފައިވާ ކަމަށް ވެސް ވިދާޅުވި ބޭފުޅަކީ ހަމަ ޙުދު ރައީސް މުއިއްޒެވެ.

ކުރީ ސަރުކާރުން ރާއްޖޭގެ އިގްތިޞާދީ ހާލަތު އަނދަވަޅަކަށް ވައްޓާލައިގެން އެކަން ހައްލު ކުރަން އައި ވެރިޔާގެ ސަރުކާރުގެ ފުރަތަމަ 7 މަސް ދުއްވާލީ ބޭކާރު ޚަރަދުތަކެއް ކުރުމުގައެވެ. އެގޮތުން ދަތުރުފަތުރާ، މީހުންނަށް ރިޝްވަތު ދިނުމަށާއި، ނުކަތާ ވަރަށް ސިޔާސީ މުވައްޒަފުން އައްޔަންކޮށްގެން މުސާރަ ދިނުމާއި، ކާމިޔާބީ އެއް ލިބިއްޖެނަމަ އުފާ ފާޅުކުރުމުގެ ނަމުގައި މިލިއަނުން ހަރަދުކުރުން ހިމެނެއެވެ.

7 މަސް ފަހުން އިގްތިޞާދީ ހާލަތު އެއްކަލަ އަނދަވަޅަށް ވެއްޓިއްޖެއެވެ. ހުރިހާ ވެރިން ތެޅިފޮޅެން ފަށައިފިއެވެ. އެހެންތާވާނީ މިއޮށްހާ ދުވަހު އިގްތިޞާދީ ހާލަތު ހަމަ ބަރާބަރެވެ. އެއްކަލަ ހެދި މޮޅެތި ޕްލޭންތައް ފޮރުވައިގެން އުޅުއްވީ އެހެންވެތާއެވެ.

ޚަރަދު ކުޑަކުރުމުގެ ސިޔާސަތެއް ސަރުކާރުން ފަށައިގެން ކުރިޔަށްގެންދާެއިރު މިއީ ރައީސް މިހާގެ "ޕްލޭންގެ" ބައެއް ކަމަށް ވެސް ސަރުކާރުގެ އިސްވެރިން އެބަ ވިދާޅުވައެވެ.ފެންނަ ފެނުމަށް އެއީ ހަމަ ދައްކާ ވާހަކައެކެވެ. މީހުންގެ ލޯމައްޗަށް ދައްކާ ދަޅައެއްކަން އެންމެނަށް ވެސް އެނގެއެވެ. ރައްޔިތުންގެ ލޮލުގައި އަޅުވާ އަނދުނެކެވެ. އެއާ ޚިލާފަށް ޚަރަދު ކުޑަކުރުމުގެ ނަމުގައި ސަރުކާރުން ކުރަމުންދާ ކަންކަމަކީ މާ ކުރިން ރޭވި ނިމިފައިވާ ކަންކަމެވެ. ރައީސް ޑރ މުއިއްޒު ވިދާޅުވީ އެއްވެސް ކަމެއް ނޭނގި ވަގުތުން ވަގުތައް ނުކުރައްވާ ކަމަށެވެ. ކޮންމެ ކަމަކީވެސް އެނގިހުރެ މާކުރިން ޕްލޭން ކުރެވިފައިވާ ކަންކަން ކަމަށެވެ. އަޖައިބެއް ނުވާނެތޯއެވެ.

ފެނިގެންމިދަނީ "ވެލް ޕްލޭންޑް" ސަރުކާރުގެ "ޕްލޭންތައް" މިދަނީ ޗޮކުންނެވެ.