ސަރުކާރު ބަދަލުވެ ދައުލަތުގެ ވުޒާރާތަކަށް ވަޒީރުންނާއި ވަޒީރުންގެ ނައިބުން އައްޔަން ކުރުމަކީ އަލަށް ކުރާ ކަމެއް ނޫނެވެ. ކޮންމެ ސަރުކާރަކުން ވެސް ކެބިނެޓެއް ކަނޑައަޅައި ވުޒާރާތަކަށް ނައިބުން އައްޔަން ކުރެއެވެ. ނަމަވެސް 2023 ގައި ބަދަލުވި މި ވެރިކަމުގައި އުޅެނީ، ވަޒީރުންގެ ނައިބުން އައްޔަން ކުރަން ފެށި ގޮތަށް ހުއްޓުމަކަށް އަންނަން ނޭނގިގެންނެވެ.

ބައެއް ވުޒާރާތަކުގައި މިހާރުވެސް 10 އަކަށް ވުރެ ގިނަ ވަޒީރުންގެ ނައިބުން އެބަ ތިއްބެވެ. އެހެން ނަމަވެސް ހުއްޓުމެއްނެތި އަދިވެސް އަންނަނީ ވަޒީރުންގެ ނައިބުން އައްޔަން ކުރަމުންނެވެ.

ނައިބުން އައްޔަން ކުރުމަކުން ގޯހެއެ ނެތެެވެ. އެހެން ނަމަވެސް، ވަކި ވަކި ވުޒާރާތަކަށް ބަލާލި ނަމަވެސް ފެނިގެން ދަނީ ތައުލީމީ ފެންވަރެއް ނެތް މީހުންތަކަށް ހަމަ އެކަނި ސިފައަށް ބަލާފައި މަގާމް ދެމުންދާ މަންޒަރެވެ.

އެގޮތުން އެންމެ ގިނަ ނައިބުން ތިބި ވުޒާރާއަކީ ހޯމްލޭންޑް ސެކިއުރިޓީ ކަން ރައީސް އޮފީހުގެ ވެބްސައިޓްގައިވާ މައުލޫމާތުން ހާމަވެގެންދެއެވެ. އެ ވުޒާރާއަށް އެކަނި ބަލައިލި ކަމުގައި ވީނަމަވެސް މިހާތަނަށް 15 ވަޒީރުންނަށް މަގާމު ދެއްވާފައި އެބަވެއެވެ.

މިނިސްޓްރީ އޮފް ޓޫރިޒަމް އެންޑް އޭވިއޭޝަން އަށް ވެސް ކުރިން ދުވަހަކު ވަނީ ނުލާހިކު ޒުވާން ނައިބެއް އައްޔަންކުރައްވާފައެވެ. އެއި އެމެއެމްޕީއާރުސީގެ މެނޭޖިންގ ޑިރެކްޓަރު ފާތިމަތު ތައުފީޤްގެ ކޮއްކޯފުޅު ހިންދު ތައުފީޤެވެ. ކެބިން ކްރޫއެއްގެ ވަޒީފާ އަދާކޮށްފައިވާ މި ރީތި ޒުވާނާ އަށް މަގާމް ދީފައިވާ އިރު އޭރުވެސް އެ ވުޒާރާގައި 10 ނައިބުން ތިބިކަން ފާހަގަކޮށްލަން މުހިންމު ކަންނޭނގެއެވެ.

މަތިބަރު ނުވާނެކަމަށް ދައުވާކުރި މި ސަރުކާރަކީ ފެށުނީއްސުރެ ކެބިނެޓުގަޔާއި ދައުލަތުގެ ވުޒާރާތަކުގެ އިސް މަގާމަތަކުގައި ތިބޭނީ ގާބިލް ޒުވާން ތައުލީމީ ފެންވަރު ރަނގަޅު ބައެއް ކަމަށް ބުނި ބައެކެވެ. ފުރަތަމަ ކެބިނެޓް އިފްތިތާޙްކޮށް ނައިބުން އައްޔަން ކުރަން ފެށި އިރު ކަން ހިގައިދިޔައީ ވެސް ހަމަ އެފަދައިންނެވެ. ނަމަވެސް މާގިނަ ދުވަސްތަކެއް ނުވަނީސް ސަރުކާރުގެ އިސް މަގާމް ތަކުގައި ތިބި ބޭފުޅުންގެ އަތް މަތި ދަތިކަމުން އެހީ ފޯރުކޮށްދިނުމަށްޓަކައި އެބޭފުޅުންގެ އާއިލީ ބޭފުޅުންނާއި ކޮއްކޮ އާއި އެހެނިހެން އާއިލީ މެންބަރުންނަށް މަގާމްތައް ތަބަކަށްލައިގެން ބަހަންފެށިއެވެ. މިކަން ނުދަންނަ ރައްޔިތަކު މި ރާއްޖޭގައި މަދުވާނެކަން ޔަގީނެވެ.

ތައުލީމީ ފެންވަރަށް ބަލައިލިކަމުގައިވީނަމަވެސް، ބައެއް ނައިބުންނަކީ، އެންމެ އާދައިގެ ތައުލީމީ ފެންވަރުވެސް ނެތް މީހުންނެވެ. އެންމެ ނައިބުން ގިނަ ވުޒާރާއަށް ބަލައިފިނަމަ އެކަން ހާމަވެގެންދާނެއެވެ.

މިހާރު ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަކީ ނައިބު ސަރުކާރުގެ ގޮތުގައި ވަނީ ސިފަވެފައެވެ. ވާނީވެސް އެހެންތާއެވެ. 700 އަށް ވުރެ ސިޔާސީ މަގާމްތައް ގިނަ ނުކުރާނެކަމަށް ބުނެ ވެރިކަން ބަދަލުވުމަށްފަހު ވީ ކޮންމެ ދުވަހަކަށް ނައިބު ވަޒީރަކު އައްޔަން އެބަ ކުރައްވައެވެ.

ސޯޝަލް މީޑިއާގެ އެކި ޕްލެޓްފޯމްތަކުގައިވެސް މި ނައިބުން ވަނީ މިހާރު ބޮޑު ޖޯކަކަށް ވެފައެވެ. ގިނަ ބަޔަކު ބުނަމުންދާ ގޮތުގައި ރައީސް މުއިއްޒު އުޅުއްވަނީ ރޯދަމަހަށް ނައިބުންގެ ތާސްބައި ތަކެއް ތައާރަފް ކުރުމުގައި މަސްއޫލުވެގެންނެވެ.