ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައެއްގައި ފަސް ޒުވާނަކު ހައްޔަރުކޮށް ބަންދުކޮށްފިއެވެ.

ކުރިމިނަލް ކޯޓުން ނެރުނު އަމުރުތަކުގައިވާ ގޮތުން ބަންދުކުރީ އުމުރުން 19 އަހަރުގެ މީހަކާއި، 20 އަހަރުގެ މީހަކާއި، 23 އަހަރުގެ މީހަކާއި، 24 އަހަރުގެ ދެ މީހުންނެވެ. މި އެންމެންނަކީވެސް ދިވެހިންނެވެ.

ބަންދު ކުރި މީހުންގެ ތެރެއިން ތިން މީހުން ފަސް ދުވަހުގައި ބަންދުގައި ބައިތިއްބަން އަމުރުކޮށްފައިވާއިރު ބާކީ ތިބި ދެ މީހުން ތަހުގީގު މަރުހަލާ ނިމެންދެން ކުރިމިނަލް ކޯޓުންވަނީ އަމުރުކޮށްފައެވެ.

ޖަމާއަތް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގެ ތުހުމަތުގައި ބަންދުކުރި މި އެންމެން ބަންދުގައި ބައިތިއްބަން އަމުރުކުރީ އެމީހުން މުޖުތަމައަށް ދޫކޮށްލައިފިނަމަ މުޖުތަމައުގެ ސަލާމަަތަށް ނުރައްކަލެއް ކުރިމަތިވެދާނެ ކަމަށް ފެންނާތީއެވެ.

އެ މީހުން ބަންދުގައި ބައިތިއްބަން އެދި ފުލުހުންވަނީ ހެކީގެ ގޮތުގައި އިންޓެލިޖެންސް ރިޕޯޓާއި، ހާދިސާގެ ރިޕޯޓާއި، ސީސީޓީވީ ފުޓޭޖާއި އެ ފުޓޭޖުގެ ސްނެޕްޝޮޓުތަކާއި އަނިޔާ ލިބުނު މީހާއަށް ލިބުނު އަނިޔާގެ ފޮޓޯތައް ހިއްސާކޮށްފަައެވެ.