ގަރުދިޔަ އާ ބަތާ ކައިގެން ރާއްޖޭގައި ޚަރަދު ކުޑަކުރުމުގެ ސިޔާސަތެއް ސަރުކާރުން ތައާރަފުކޮށްފިއެވެ.
މިކަން އިއުލާންކޮށްފައިވަނީ ރައީސް އޮފީހުގެ މިނިސްޓަރު އަލީ އާރިފުއެވެ.
ޕީއެންސީގެ ޖަގަހަ ޖަލްސާގައި ރޭ ވާހަކަދައްކަވަމުން އާރިފް ވިދާޅުވީ ރާއްޖެއަށް ކުރިމަތިވެފައިވާ މާލީ ދަތިތަކުން އަރައިގަތުމަށް ރައްޔިތުން އެއްބާރުލުން ބޭނުންވާ ކަމަށާއި އެކަމަށްޓަކައި ގަރުދިޔަ އާއި ބަތާ ކައިގެން އާދައިގެން ދިރިއުޅުމަށް ތިރިވެލަންޖެހޭ ކަމަށްށެވެ. އެެހެން ނަމަވެސް އޭނާ ވަނީ މިއީ ދަތި ދުވަސްކޮޅަކަށް ވިޔަސް، ރާއްޖެ ބަނގުރޫޓު ނުވާނެ ކަމަށާއި ކުރިމަގު ވަރަށް ފާގަތި ކަމަށް ވިދާޅުވެފައެވެ.
ފައިސާ ޗާޕްކުރުމަކީ ފަސޭހަ ގޮތެއް ކަމަށާއި ނަމަވެސް ރައީސް މުއިއްޒު ބޭނުންވަނީ އެކަން ނުކޮށް ހިތި ބޭސް ބޮއެގެން ވިޔަސް މި ދަތިކަމުން އަރައިގަތުމަށް ކަމަށް އަލީ އާރިފު ފާހަގަ ކުރެއްވި އެވެ. އަދި އޭނާ ދައުލަތުގެ މާލީ ހާލަތު ސިފަކުރެއްވީ ގުނަވަނަކަށް ކެންސަރުޖެހިފައިވާ ބަލި މީހެއްގެ މިސާލުގެ ގޮތުގަ އެވެ. މީގެ އިތުރުން ނޫސްވެރިންނަށް ވެސް އާރިފް ވަނީ ފާޑުވިދާޅުވެފައެވެ.
އާރިފު މިހެން ވިދާޅުވެފައިވީ ނަމަވެސް ސަރުކާރުން ޚަރަދު ކުޑަކުރުމުގެ ނިޔަތުގައި އެއްވެސް މަސައްކަތެއް އެދެވިގެންވާ ގޮތުގައި ކުރަމުން އަންނަ ތަނެއް ނުފެނެއެވެ. ސަރުކާރުގެ ރަސްމީ ދަތުރު ތަކާއި ސިޔާސީ މަގާމުތައް އުފެއްދުން އަދިވެސް ކުރިއަށްދާއިރު ޚަރަދު ކުޑަކުރަން ގަރުދިޔަ އާއި ބަތް ކެއުން ނޫން ކަމެއް ސަރުކާރުން ނުވިސްނަނީބާވައެވެ.
