ރައްޔިތުންގެ މަޖިލީހުގެ ޖަލްސާތަކެއް ދައުރުން ބޭރުން ބޭއްވުމުގެ މަޝްވަރާތައް ފަށައިފިއެވެ.

މަޖިލިސް އިދާރާ އިން ހާމަކޮށްފައިވާ ގޮތުގައި މި ފަދަ މަޝްވަރާތަކެއް ފަށާފައިވަނީ ދައުރުން ބޭރުން ޖަލްސާތަކެއް ބާއްވަން މަޝްވަރާކުރަން ފަށާފައިވަނީ މަޖިލިސް އިންތިހާބު ރޯދަ މަހުގެ ފަހުން ބޭއްވުމަށް ގާނޫނަށް ގެންނަަޖެހޭ ބަދަލާއި މަޖިލީހުން ނިންމަން ހުރި އެހެން ބައެއް މަސައްކަތްތައް އަވަސް ކުރަންށެވެ.

އެގޮތުން މަޖިލީހުގެ މިއަހަރުގެ ފުރަތަމަ ދައުރު ފަށާނީ ފެބްރުއަރީ 5، ގަ އެވެ. ރައްޔިތުންގެ މަޖިލީހުގެ އިންތިހާބު މިހާރު ތާވަލުކޮށްފައި އޮތީ މާޗް 17، އަށެވެ. އެއީ ރޯދަމަހުގެ ހަތް ވަނަ ދުވަހެވެ.

އެހެންކަމުން އެކަމަށް ބަދަލު ގެންނައުމަށް އިހަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު ވަނީ އިންތިހާބުތަކާބެހޭ އާންމު ގާނޫނަށް، ރޯދަ މަހު އިންތިހާބުތައް ބޭއްވުން މަނާކުރާ މާއްދާ ހިމެނޭހެން 20 މާއްދާ އިސްލާހު ކުރަން ވަނީ ހުށަހަޅާފައެވެ.

އެހެންކަމުން އެ އިސްލާހު ގެނައުމުގެ މަސައްކަތަށް މަގު ފަހިކުރުމަށް ދައުރުން ޞޭރުން ޖަލްސާތަކެއް ޖެހޭނީ ބާއްވަންކަމަށް މަޖިލީހުގެ މެޖޯރިޓީ އޮންނަ އެމްޑީޕީއަށް ފެންނާތީ މަޝްވަރާތައް ވަނީ ފަށާފައެވެ.

ޝިފާއި އިސްލާހު ހުށަހެޅުއްވީ ރޯދަ މަހާ ގުޅިފައިވާ ދިވެހިންގެ ހާއްސަ އާދަކާދަތަކާއި އަދި ރޯދަ މަހާ ގުޅިގެން ދައުލަތުގެ މުވައްޒަފުންގެ ވަޒީފާ އަދާކުރުމުގައި ވެސް ގެންނަ ބަދަލުތަކާއި މިއެންމެހާ ކަމަކަށް ރިއާޔަތް ކުރުމުގެ ގޮތުންނާއި ވީހާ ގިނަ ބަޔަކުގެ ބައިވެރިވުން ހިމެނޭފަދަ އިންތިހާބެއްކަން އިތުރަށް ކަށަވަރުކޮށް ޔަގީންކުރުމުގެ ބޭނުމުގައި ކަމަށް ވިދާޅުވެފައިވެއެވެ.