ދިވެހީންގެ ދިވެހިރާއްޖެއެކޯލައެވެ. ދިވެހީންގެ ދިދަ ދިވެހީންނަށްށޯލައެވެ. ދިވެހީންގެ މިނިވަންކަން ދިވެހީންނަށޯލައެވެ. މިއި ހައްތަހާވެސް އަދުވެ ވެރިން ވިދާޅުވާ ޔޯލަ ޔޯލަ ވާހަކައެވެ.

2023ގައި އެމްޑީޕީގެ ވެރިކަން ނިންމާ ދިވެހިން ދިވެހީންގެ ވެރިކަމެއް ގެނައުމުގެ ނިޔަތުގައި ޕީޕިއެމް ޕީއެންސީގެ ރިޔާސީ ކެންޑިޑޭޓަށް ވޯޓު ދިނީ ނުހަނު އުއްމީދާ އެކުއެވެ. 2018 އިން 2023 އަށް ދިވެހީން ތަހައްމަލުކުރި ހިތްދަތި ކަމާ ބިރުވެރިކަމާ ތަދުކަން ވެސް ނައްތާލާ ހިތްހަމަ ޖެހުމާ ފޯރުންތެރިކަމާ މިނިވަންކަން ކަށަވަރުކުރުމަށް ދިވެހީންގެ އޮޑޮ ދިވެހީންގެ ރާއްޖެއަށް ބަނދަރުކުރުމަށެވެ.

އެހެންނަމަވެސް ވެރިކަން ބަދަލުވެ މާ ގިނަ ދުވަހެއް ނުވެއެވެ. ވެރިންގެ ކުލަ ބަދަލުވާން ފެށިއެވެ. ހަރުފަވެސް ދުލި ބަދަލުކުރާ ވާހަކަ އަހަރުމެން އަޑު އަހަމުއެވެ. އެ އުސޫލުން ޕީއެންސީ ވެރިކަމުގެ ވެރިން ރައްޔިތުންނަށްވީ ވައުދތައް ހަނދާ ނައްތާލާން ފެށިއެވެ. ނޫނެކެވެ. ހަންދާ ނައްތާލީ ނޫނެވެ. ޣައްދާރުވިއެވެ. ކުރިން ބުނި އެއްޗެހި ކެންސަލް ކުރަން ފެށިއެވެ.

އިންޑިއާ ސިފައިން ގައުމުން ބާލަން ވީ ވައުދު އެމީހުްނގެ ޔުނިފޯމު ބާލާ ކުލަ ހެދުމަށް ބަދަލުކުރިއެވެ. އެމްއެމްޕީއާރުސީގެ ޚިޔާނާތުގެ މައްސަލައިގައި ރައީސް އަބްދުﷲ ޔާމީން ފްރޭމުކޮށްގެން އުޅޭ ކަމަށާ އެމަނިކުފާނަށް ނުހައްގުން އަނިޔާ ދެމުންދާ ވާހަކަ ބާރު އަޑުތަކުން ޕޯޑީއަމްތައް ފަޅާއިގެން ދާވަރަށް އަޑުގަދަކުރުމަށް ފަހު އެމަނިކުފާނުގެ ހިޔަލުގައި ނިވަލުގައި ތިބެގެން ވެރިކަމަށް އައިސް އެމްއެމްޕީއާރުސީ މައްސަލައިގައި ސެލެކްޓިވް ޖަސްޓިސެއް ގެންގުޅޭ ކަމަށް ކުރިން ތުހުމަތުކުރި ޕީޖީވެސް މިހާރު އޯކޭ ވެއްޖެއެވެ.

މިއީ އަބަދުވެސް އެންމެ ފުރަތަމަ ދީނާ ގައުމު އިސްކުރާނެ ވެރިންތަކެއް ތިބޭނެ ސަރުކާރެއް ކަމަށް ވިދާޅުވެ އައިސް އިސްލާމުދީނަށް ހަޖޫ ޖެހި މީހުންގެ މައްސަލަވެސް ބަލާލަން ނުކެރުނެވެ. އެމްޑީއެން، އެމްޑީއެން ޔޫސްޑް ޓުބީއަށް ބަދަލުވިއެވެ.

ނުވިތާކަށް މުޅި ދުނިޔެ އެކަމަކާ މެދު ކަންބޮޑުވުން ފާޅުކުރަމުން އަންނަ ފަލަސްތީނު އިޒްރާއިލު ހަނގުރާމައަކީ ދެ ގައުމެއްގެ ދާޚިލީ މައްސަލައެއް ކަމަށްބުނެ އެއީ ނަސްލެއް ނައްތާލުން ކަމަށް ޒަމާނުއްސުރެ ދިވެހީން ބުނަމުން އައި ބުން ވެސް އެންމެ ކުޑަ މިނުން ހުއްޓާލީއެވެ.

ސަހްޔޫނީންގެ ޕާސްޕޯޓު މަނާކުރަން ދިވެހިން ތަކުރާރުކޮށް ގޮވަމުންދާއިރު ވެސް އެ ބިލުވެސް މޭޒުތަން ދޮަށަށް ލައްވައިގެ ްއިންނަވާ މަޖިޅިހާ އެކަން ޖާމިނުކުރަނީއެވެ.

މިހުރީ ހައްތަހާވެސް މި ސަރުކާރުން ކުރަން ޖެހިލުންވެ ފަސް ޖެހޭ ކަންކަމެވެ. އިންޑިއާ ފައި ބުޑަށް ނާށި ގަނޑު ހިފައިގެން ޖިޒީ ދައްކަމުން ސަލާން ޖަހަން ދިއުމަށް ފަހު އެތަނުން ދޭ ފިޔާ ކޮޅަކާ ބިސް ކޮޅަކާ އަލުވި ކޮޅެއްގެ ދަހިވެތިކަމުގައި އިންޑިއާ ސިފައިން ބޭރު ކުރަން ނުކެރުނެވެ. އެމްއެމްޕިއާރުސީ މައްސަލައަކީ މި ސަރުކާރަށް ވެސް ބަލަން ނުކެރޭނެ މައްސަލައެއްކަން ޖަގަހަ ޖަލްސާތަކުގެ ގޮނޑީ ބަރީގެ ކުރީ ސަފަށް އެކަނި ބަލާލުމުންވެސް ހާމަވާނެއެވެ. އަދި އެމްއެމްޕީއާރުސީ ފައިސާއޭ ކިޔާ ޕޯޑިއަމްގައި ކިތަންމެ ވަރަކަށް ތެޅި ނަމަވެސް އެވެ. ނުވިތާކަށް ސަހްނޫނީންގެ ޕާސްޕޯޓު ބޭން ކުރުމަކީ މި ސަރުކާރަށް ލާހިކަ ކުޅަދާނަ ކަމެއް ނޫނެވެ. އެމެރިކާ ނުރުހިދާނެތީއެވެ.

އެހެންކަމުން ސަރުކާރުގެ ދިފާއުގައި ޓްވީޓުކުރާ ކުދިންނާ ކޮމެންޓުކުރާ ކުދިން އުޑުގަ ޖެހިފައި ބިމުގައި ޖެހުނަސް މިހުރީ މިސަރުކާރަށް ކުރަން ނުކެރޭނެ ކަންކަމެވެ. ހިތްވަރެއް ހުރިއްޔާ ނިކަން ކޮށްފައި ދައްކާށެވެ.