ރައްޔިތުންގެ މަޖިލިސް މެމްބަރުންގެ އިތުރުން އެބޭފުޅުންގެ އާއިލާގެ ބޭފުޅުންނަށާއި، އެބޭފުޅުންނާ އެކު ފުރާ ހުރިހާ އެންމެންނަށް ވެސް ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ ވީއައިޕީ ލައުންޖުން ހިދުމަތްދޭން އާންމު ކޮމިޓީއިން ނިންމުމާ އެކު ގިނަ ބއެއްގެ ފާޑުކިޔުމާ ނުުރުހުން އަމާޒުވުމުން އެ ނިންމުން ބަދަލުކޮށްފިއެވެ.

މެމްބަރުންނަށް ވީއައިޕީ ލައުންޖުން ހިދުމަތްދޭ އުސޫލަށް ބަދަލު ގެންނަން ކޮމިޓީއަށް ހުށަހެޅުއްވީ ފޭދޫ ދެކުނު ދާއިރާގެ މެމްބަރު އިބްރާހިމް ދީދީ އެވެ. އޭނާގެ ހުށަހެޅުއްވުމުގައި ވިދާޅުވެފައިވަނީ، މެމްބަރުން ވީއަޕީ ލައުންޖުގެ ހިދުމަތް ހޯދުމުގައި އަމަލުކޮށްފައިވަނި ވަރަށް ޒިންމާދާރުކޮށް ކަމަށް ވިދާޅުވެ، މެމްބަރުންނާ އެކު ވަޑައިގަންނަވާ ބޭފުޅުންނަށް ވެސް އެ ހިދުމަތް ދޭން ނިމިދިޔަ 19 ވަނަ މަޖިލީހުން ފާސްކޮށްފައިވާ ކަމަށެވެ.

އެ ހުށަހެޅުމާ މެދު ކޮމިޓީގެ ބައެއް މެމްބަރުންގެ މެދުގައި ހިޔާލުތަފާތުވުންތަކެއް ހުރި ނަމަވެސް، ކޮމިޓީގެ އަގުލަބިއްޔަތުން އެ ހުށަހެޅުން ވަނީ ފާސްވެފައެވެ.

ކޮމިޓީއިން މިގޮތަށް ފާސްކޮފައި މިވަނީ އުސޫލު ބަދަލުކޮށް، މެންބަރުންނަށާއި އެ މެންބަރެއްގެ އާއިލާއަށް ލިބޭ ލައުންޖު ހިދުމަތުގެ އިތުރުން އެ މެންބަރަކު ހިޔާރުކުރާ އިތުރު ދެ މީހަކަށް އެއާޕޯޓުގެ ވީއައިޕީ ލައުންޖުން މަޖިލީހުގެ ހަރަދުގައި ހިދުމަތް ލިބޭ ގޮތަށް އާންމު ކޮމިޓީން 2021ގެ ސެޕްޓެމްބަރު މަހު ނިންމާފައިވަނިކޮށެވެ.

މިކަމާ ގުޅިގެން ކުރިގެ ބައެއް މެމްބަރުންނާ އަދި އާންމުންގެ ފާޑުކިޔުން ޕީއެންސީގެ މެޖޯރިޓީ އޮތް މަޖިލީހަށް އަމާޒުވެފައިވެއެވެ. ހަރަދު ކުޑަ ކުރަން އާންމު ރައްޔިތުންނަށް އިލްތިމާސް ކޮށްފައި މެންބަރުންނާއި ސަރުކާރުގެ އިސްވެރިން އިއްޒަތުގައި ހަރަދު ބޮޑުކޮށް އުޅުމަކީ ބަލައިގަނެވޭނެ ކަމެއް ނޫން ކަމަށް ގިނަ ބަޔަކު ޝުއޫރު ފާޅުކުރުމުން ކޮމިޓީއިން ވަނީ ރޭ އެ ނިންމުން ބާތިލުކޮށްފައެވެ.