ކުރީގެ ސަރުކާރުން ހިންގި "ބިންވެރިޔާ" އާއި "ގެދޮރުވެރިޔާ" ސްކީމްގެ ދަށުން ލިބުނު ގޯއްޗާއި ފްލެޓް ހަވާލުކުރުން ލަސްވާތީ މުޒާހަރާކުރަން ނިންމައިފިއެވެ.

އެ މުޒާހަރާ ރާވައި ހިންގުމުގައި އިސްކޮށް އުޅެނީ ފުލެޓުވެރިންނާ ގޯތި ލިބުނު ފަރާތްތަކުގެ ހައްގުގައި މަސައްކަތް ކުރާ ޖަމްއިއްޔާތަކަކުންނެވެ.

އެގޮތުން ފުލެޓުވެރިންގެ ހައްގުގައި މަސައްކަތްކުރާ ފަހި ޔޫނިއަންއާއި މާލެ ސަރަހައްދުން ގޯތި ލިބުނު ފަރާތްތަކުގެ ހައްގުގައި މަސައްކަތް ކުރާ ގިރާވަރު ސިޓިޒެންސް އެސޯސިއޭޝަނުގެ އިތުރުން މާލެ ރަށްވެހިންގެ ޖަމިއްޔާއިން ބާއްވަން ނިންމާފައިވާ މުޒާހަރާ އޮންނާނީ މިރޭ 9:00 ގައި ހެންވޭރު ލޮނުޒިޔާރަތް ޕާކު ކައިރީގައެވެ.

އެ މުޒާހަރާ ކުރިއަށް ގެންދަން ރާވައިފައި ވަނީ ވަރަށް ހަމަހިމޭންކަމާއެކު ސުލްހަވެރިކޮށް ކަމަށް މުޒާހަރާ ރާވާ ހިންގާ ފަރާތްތަކުން ވަނީ ހާމަކޮށްފައެވެ. މުޒާހަރާގައި ބައިވެރިވުމަށް މާލެ ސަރަހައްދުން ގޯތި ލިބުނު މީހުންނާ ފްލްޓުވެރިންވެސް ނުކުތުމަށް ވަނީ ގޮވާލާފައެވެ.

ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުން މާލޭގެ ރައްޔިތުންނަށް ގޯތި ދޫކުރުމަށް ކުރިއަށް ގެންދިޔަ "ބިންވެރިޔާ" ސްކީމުގެ ތެރެއިން 9،000 އަށް ވުރެ ގިނަ ގޯތި ދޫކޮށްފައިވެ އެވެ. މި ގޯތި ދޫކޮށްފައިވަނީ ހުޅުމާލޭގެ އިތުރުން ގުޅީފަޅާއި ގިރާވަރުފަޅުންނެވެ.