ރާއްޖޭގައި އޮންލައިން ޕްލެޓްފޯމުތައް މެދުވެރިކޮށް ފައިސާ ލިބުމަށް ހުރި ހުރަސްތައް ނައްތާލުމުގެ މަގްސަދުގައި މެއި މަހުގެ ތެރޭގައި އީ-ވޮލެޓް ތައާރަފް ކުރެވޭ ވަރު ވާނެ ކަމުގައި ރައީސް ޑރ. މުހައްމަދު މުއިއްޒު ވިދާޅުވި ނަމަވެސް މެއި މަސް ނިމި ޖުލައި މަހުގެ މެދަށް ދިޔަ އިރުވެސް އީ-ވޮލެޓް ތައާރަފް ކުރެވިފައިނުވާކަން ހާމަވެެއްޖެއެވެ.

ކުދި ވިޔަފާރިތައް ބޭނުންވާ އީ-ވޮލެޓް އާއި ޕޭޕަލްގެ ޚިދުމަތް ދޭނެ ކަމަށް ވައުދުވެ، އެމަނިކުފާނު ވެރިކަމަށް ވަޑައި ގަތީ، ޒުވާނުންގެ ވޯޓާއި އެކީއެވެ. އެންމެފަހުން، ރައީސް މުއިއްޒު އީ-ވޮލެޓްގެ ވާހަކަ ދެއްކެވީ ވެރިކަމަށް ވަޑައިގެން 21 މާރޗްގައެވެ.

އެގޮތުން ”ރައީސްގެ ޖަވާބު“ ޕްރޮގްރާމްގައި މާލެ ސިޓީ، މއ.ނައިޓްލައިޓް، އަބްދުﷲ އިނާން ކުރި ސުވާލެއްގައި ބުނެފައި ވަނީ އީ-ވޮލެޓްގެ ހިދުމަތް ފައްޓަވާނެ ކަމަށް ރައީސް ޑރ. މުއިއްޒު ވިދާޅުވެފައިވާ ކަމަށެވެ. އެހެންވެ، އެކަމުގެ އަދާހަމައެއް އޮޅުން ފިލުވަން ބޭނުންވާ ކަމަށް ވެސް އެ ޒުވާނާ ބުނެފައިވެއެވެ.

މި ސުވާލަށް ޖަވާބު ދެއްވަމުން ރައީސް މުއިއްޒު ވަނީ އީ-ވޮލެޓްގެ ހިދުމަތް ތައާރަފް ކުރުމުގެ މަސައްކަތް ސަރުކާރުން ކުރަމުން އަންނަ ކަމަށް ވިދާޅުވެފައެވެ. އަދި އުންމީދު ކުރައްވަނީ އެންމެ ލަސްވެގެން މެއި މަހުގެ ތެރޭގައި އީ-ވޮލެޓްގެ ހިދުމަތް ތައާރަފް ކުރެވިގެންދާނެ ކަމުގައި ވެސް ރައީސް މުއިއްޒު ވިދާޅުވިއެވެ.

ރައީސް އޮފީހުގެ މިނިސްޓަރު އަބްދުﷲ ނާޒިމް ނޫސްވެރިންނާ ބައްދަލު ކުރައްވާ ކެބިނެޓް ގެ ކަންކަން ހިއްސާ ކުރެއްވުމަށްފަހު ވިދާޅުވެފައި ވަނީ އިންޓަނެޓާއި ސައިބާ ސެކިއުރިޓީއާ ގުޅުން ހުރި ކަމަކަށްވާތީ، އެކަމާ ގުޅޭ ހާއްސަ ގާނޫނެއް ތައާރަފްކުރުމަށްޓަކައި އެ ކަމާ ގުޅޭ ބިލެއް ޑްރާފްޓް ކުރަން ނިންމާފައިވާ ކަމަށެވެ.

މެއި މަސް ނިމުނު އިރުވެސް އީ-ވޮލެޓް ތައާރަފް ނުކުރެވުނު ސަބަބު ވެސް ސަރުކާރުން ހާމަކޮށްފައިނުވާކަން ފާހަގަކޮށްލެވެއެވެ.

ހަމަ އެހެންމެ ޕޭޕަލް ހިމެނޭހެން ރާއްޖޭގައި އޮންލައިން ޕޭމަންޓް ސިސްޓަމްތައް ބޭނުން ކުރެވޭނެ ގޮތް އެމަނިކުފާނުގެ ވެރިކަމެއްގައި ހައްދަވައިދެއްވާނެ ކަމަަށް ރައީސް މުއިއްޒު ވައުދުވެވަޑައިގެންނެވި ވައުދު ވެސް އަދިވެސް ނުފުއްދެއެވެ.

އެގޮތުން އިންތިހާޞު ތެރޭގައި އޮގަސްޓު މަހުގެ 21 ވަނަ ދުވަހު އައްޑޫ ސިޓީގެ ރައްޔިތުންނާ ވާހަކަ ދައްކަވަމުން ރައީސް މުއިއްޒު ވަނީ އޮންލައިން ޕޭމަންޓް ސިސްޓަމްތެރޭގައި ހިމެނޭ ޕޭޕަލް އާއި ޕޭއޯނިޔާއާއި ސްޓްރިޕްއާއި ސްކްރިލްއާއި ނެޓެއްލާ މި ފަަދަ އޮންލައިން ޕޭމަންޓް ސިސްޓަމްތައް ރާއްޖޭގައި ވިޔަފާރިކުރާ ފަރާތްތަކަށް ބޭނުން ކުރެވޭ ގޮތަށް ބައްޓަން ކޮށްދެއްވާނެކަމަށެވެ. އެކަން އެގޮތަށް ބައްޓަން ކުރުމުގެ ސަބަބުން ވަރަށް ގިނަ ފަސޭހަތަކެއް ވެގެންދާނެ، ވަރަށް ފަސޭހަވާނެކަމަށްވެސް ރައީސް މުއިއްޒު ހިތަދޫގައި ބޭއްވި ޖަލްސާގައި ވިދާޅުވިއެވެ.

ގްލޯބަލް އީކޮމާސް ޕްލެޓްފޯމްތަކުގައި ހިމެނޭ އެމެޒަން، ޝޮޕިފައި، ޝޮޕީ އަދި ލަޒާޑާފަދަ އީ ކޮމާސް ޕްލްޓްފޯމްތަކުގައިި ސެލާ އެކައުންޓްތައް ރާއްޖޭގައި ކްރިއޭޓްކުރެވޭނެ އިންތިޒާމުވެސް ހަމަ ޖައްސަވާނެ ކަމަށްވެސް ވިދާޅުވިއެވެ.

ނަމަވެސް އެކަމުގެ ވެސް އެއްވެސް އިޝާރާތެއް ސަރުކާރުގެ ފަރާތުން ވެފައިނުވާތީ ފާޑުކިޔުން ވަނީ އަމާޒުވެފައެވެ.

އެގޮތުން ކޮށްދޭނެ ކަމަށް ވިދާޅުވެ، މުޅި ސޯޝަލް މީޑިޔާގައި، ހާއްސަކޮށް ޓިކްޓޮކްގައި ރައީސް މުއިއްޒުގެ ޓީމުން އިސްތިހާރުކޮށް ޒުވާން އެތައް ހާސް ބައެއްގެ ވޯޓު ހޯދީ މިވާހަކަ ތަކުން ނަމަވެސް އެއްވެސް ވައުދެއް ފުއްދާ މަންޒަރު ނުފެންނަ ކަމަށް ވެސް ގިނަ ބަޔަކު ދަނީ ބުނަމުންނެވެ.