ބޭންކް އޮފް މޯލްޑިވްސް ޕލޓ އަށް ރައްޔިތުންގެ މަޖިލީހުގެ އިތުބާރު ނެތް ކަމަށް އެ މަޖިލީހުން ބުނެފިއެވެ.

އެ މަޖިލީހުން މިފަދައިން ބުނެފައިވަނީ، ބީއެމްއެލްގެ ކަސްޓަމަރުންގެ އެކައުންޓްތަކުން ނޭނގި ފައިސާ ގެއްލޭ މައްސަލައިގައި 19 ވަނަ މަޖިލީހުގެ އެސްއޯއީ ކޮމިޓީން ދިރާސާކޮށް ނިންމި ގޮތުގެ ރިޕޯޓާ މެދު މަޝްވަރާކުރުމަށް މަޖިލީހުގެ އެސްއޯއީ ކޮމިޓީން އިއްޔެ ބޭއްވި ބައްދަލުވުމުގައެވެ.

ބީއެމްއެލްވެސް ހާޒިރުކޮށްގެން ކުރިއަށް ގެންދިޔަ އެ ބައްދަލުވުމުގައި ކިނބިދޫ ދާއިރާގެ މެންބަރު އަލީ އަޝްރަގު ވިދާޅުވީ ކަސްޓަމަރުންގެ އެކައުންޓުން ފައިސާ ގެއްލުމާއި އެކިކަހަލަ ސްކޭމްތަކުގެ މައްސަލަތަކުގައި ރައްޔިތުން ދަނީ ބީއެމްއެލްއަށް ތުހުމަތުގެ އިނގިލި ދިއްކުރަމުން ކަމަށެވެ.

އަޝްރަގު އިތުރަށް ވިދާޅުވީ ސަރުކާރުގެ މެޖޯރިޓީ އޮންނަ ކުންފުންޏަކަށް ވުމުން ބީއެމްއެލް، ކޮމިޓީއަށް ހާޒިރުކޮށް، ރައްޔިތުންގެ އިތުބާރު ހޯދަން ކުރަންޖެހޭ ކަންކަމަށް މަޝްވަރާކޮށް، ސްކޭމްތަކަށް ހައްލު ހޯދޭނެ ގޮތްތަކާ ގުޅޭ ގޮތުން ބީއެމްއެލްއާ ސުވާލުކުރަންޖެހޭ ކަމަށެވެ.

އެ ކޮމިޓީގައި ވާހަކަދައްކަވަމުން ފޭދޫ ދެކުނު ދާއިރާގެ މެންބަރު އިބްރާހިމް ދީދީ ވިދާޅުވީ ބީއެމްއެލްގެ ފަރާތުން ކަސްޓަމަރުންނަށް އެންމެ ފުރިހަމަ ހިދުމަތެއް ނުދެވޭ ކަމަށެވެ.

ބީއެމްއެލް އިން ދޫކޮށްފައިވާ ޑޮލަރު ކްރެޑިޓް ކާޑުތަކުން މުއާމަލާތް ކުރެވޭ އަދަދު ލިމިޓް ކޮށްފައިވާއިރު، ކްރެޑިޓް ކާޑުގެ ފީތަކާއި ކޮމިޝަންތަކަށް އެއްވެސް ބަދަލެއް އައިސްފައިނުވާ ކަމަށްވެސް ވިދާޅުވިއެވެ.

މީގެ އިތުރުން ތޮއްޑޫ ދާއިރާގެ މެންބަރު ހުސައިން ސަމީރު ވެސް ވަނީ މިކަމާ ގުޅިގެން ވާހަކަ ދައްކަވާފައެވެ. އެމެމްބަރު ފާހަގަކޮށްފައިވާ ގޮތުގައި، ބީއެމްއެލްއަށް ވަނީ އިތުބާރު ގެއްލިފައެވެ.