ޚަރަދު ކުޑަކުރަން ހަފްލާތައް ނުބާއްވަން އެންގުމަށްފަހު ހުރިހާ ކައުންސިލް ރައީސުން މާލެ ގެނެސް ބޮޑު އިވެންޓެއް ބާއްވައިފިއެވެ.

އެގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިރޭ ރަށު ކައުންސިލްތައް މެދުވެރިކޮށް އައިޑީ ކާޑު ހައްދަން އެދެވޭ އިންތިޒާމު ފަހިކުރުމަށް ފަރުމާކޮށްފައިވާ "ނާރެސް" ޕޯޓަލް އިފްތިތާހުކޮށްދެއްވާފައެވެ.

މި ޙަފްލާގައި ދާޚިލީ ވަޒީރު އަލީ އިހުސާން ވިދާޅުވީ "ނާރެސް" ޕޯޓަލް މެދުވެރިކޮށް މެދުވެރިކޮށް ކައުންސިލްތަކަށް އައިޑީކާޑްގެ ސްޓޭޓަސް ބެލުމާއި މާލެއެކޭ އެއްފަދައިން އައިޑީ ކާޑް ދޫކުރުން އަދި އެޕްލިކޭޝަންތައް ބަލައިގަތުމަށް ހިދުމަތް ލިބިގެންދާނެކަމަށެވެ. އަދި ނާރެސް ޕޯޓަލްއާއެކު ކޮންމެ ކައުންސިލަކަށް 10 އިނގިލީގެ ނިޝާން ނަގާ ފިންގާ ޕްރިންޓް ޑިވައިސްތަކެއްވެސް ހަވާލުކުރެވިގެންދާނެކަމަށާއި މިކަންވެގެންދާނީ ކައުންސިލްތަކާ ޑީއެންއާރާ ދެމެދު އޮތް ގުޅުން އިތުރަށް ބަދަހިވެގެންދާނެ ކަމެއްކަމަށް އެ ވުޒާރާއިން ވިދާޅުވެއެވެ.

މިފަދަ ޙަފްލާއެއް ސަރުކާރުން ބާއްވާފައިވާއިރު މި ޙަފްލާގައި ބައިވެރިވުމަށް ރާއްޖޭގެ ހުރިހާ ކައުންސިލްތަކުގެ ރައީސުން ދައުލަތުގެ ޚަރަދުގައި މާލެ ގެނެސްފައިވާ ކަމަށް މައުލޫމާތު ލިބިފައިވެއެވެ.

ސަރުކާރުން ވަނީ ދައުލަތުގެ ޚަރަދު ކުޑަކުރުމަށް ޙަފްލާތައް ނުބޭއްވުމަށާ އަދި ދަތުރުތައް ވެސް ނުކުރުމަށް އަންގާފައެވެ. މިކަން އެންގެވީ ސީދާ ރައީސް މުއިއްޒުއެވެ. ނަމަވެސް އެމަނިކުފާނު މިވަނީ ބޭކާރު ޚަރަދެއް ކުރައްވާފައިކަމަށް ގިނަ ބަޔަކު ދަނީ ބުނަމުންނެވެ.