ރައީސް އަބްދުﷲ ޔާމީނުގެ ޝަރީއަތަށް މިހާރު އެ އިއްތިހާދުގެ ސަރުކާރުގައި އިސްކޮށް ހުންނެވި ބޭފުޅުންގެ ތެރެއިން ނުފޫޒު ފޯރުވި ބޭފުޅުންގެ "ފުލް ލިސްޓު" އެބަ އޮތް ކަމަށް ރައީސް ޔާމީން ވިދާޅުވެއްޖެއެވެ.
ޕީއެންއެފްގެ ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ އެމަނިކުފާނަށް އިއްވި 11 އަހަރުގެ ޖަލު ހުކުމުގެ އިސްތިއުނާފު ޝަރީއަތް ލަސް ކުރުމަށް މި ސަރުކާރުގެ އިސް ބޭފުޅުންގެ ބައިވެރިވުން އެބަ އޮތް ކަމަށެވެ. އެ ނަންތައް ހާމަކުރަން ޖެހޭ ވަގުތު އައުމުން އެ ކަން ވެސް ކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
އެ މަނިކުފާނަށް ލިބިފައި އޮތް ރިޔާސީ ކެންޑިޑެސީ ބާތިލު ކުރުމަށް ޕާޓީގެ ތެރެއިން ބައެއް ބޭފުޅުން މަސައްކަތް ކުރި ކަމަށް ވެސް ޔާމީން ތުހުމަތު ކުރެއްވި އެވެ. އޭގައި އެންމެ އިސްކޮށް ހުންނެވީ މިހާރު ސަރުކާރުގެ ވަޒީރަކު ކަމަށް ވެސް އެ މަނިކުފާނު ވިދާޅުވި އެވެ. ނަމަވެސް އެއީ ކޮން ވަޒީރެއް ކަމެއް ވިދާޅެއް ނުވެ އެވެ.
