މާލޭ ސިޓީ ކައުންސިލުގެ ހުސްވެފައިވާ ތިން ގޮޮނޑިއަށާ އަދި އިތުރު ގޮނޑިތަކަކަށް ކައުންސިލަރުން އިންތިޚާބުކުރުމަށް ބާއްވާ ބައި-އިލެކްޝަންގެ ވޯޓުލުން މިއަދު ހެނދުނު 08:00 ގައި ފަށައިގެން ކުރިއަށް ދާއިރު ތަރުހީބުވަރަށް ކުޑަކަން ހާމަވެއްޖެއެވެ.

ބައި-އިލެކްޝަން ކުރިއަށް ދާނީ ހެނދުނު 8:00 އިން ހަވީރު 4:00އަށް ކަމަށް އިލެކްޝަން ކޮމިޝަނުން ހާމަކޮށްފައިވެއެވެ.

ވޯޓުލުން ކުރިއަށް ގޮސް ވޯޓުލާ ގަޑި ހަމަވާން އެއް ގަޑިއިރަށްވުރެ ކުޑަވެފައިވާއިރު މިހާ ތަނަ ވޯޓު ލީ މީހުންގެ ނިސްބަތަކީ 17 އިން ސައްތަކަމަށް އީސީގެ ހިސާބުތަކުން ދައްކައެވެ.

މިއަދު ކުރިއަށްދާ ބައި އިލެކްޝާންތަކުގެ ތެރޭގައި ހިމެނެނީ މާލެ ސިޓީ ކައުންސިލްގެ މައްޗަންގޮޅި މެދު ދާއިރާއާއި، ހެންވޭރު ހުޅަނގު ދާއިރާ އަދި ހުޅުމާލެ ދާއިރާ މެންބަރު އިންތިޚާބު ކުރުމަށް ބާއްވާ ބައި-އިލެކްޝަނެކެވެ.

މީގެ އިތުރުން ފ. ބިލެތްދޫ ކައުންސިލްގެ ރައީސާއި، ކުޅުދުއްފުށި ސިޓީ ކައުންސިލްގެ ކުޅުދުއްފުށި އުތުރު ދާއިރާ ކައުންސިލް މެންބަރު އަދި ރ. ރަސްމާދޫ ކައުންސިލްގެ އަންހެން މެންބަރު ހޮވަން ބާއްވާ ބައި-އިލެކްޝަންގެ ވޯޓުލުން ވެސް ކުރިއަށް ދެއެވެ.

މި ބައި އިލެކްޝަންގައި ވޯޓުލުމުގެ ހައްގު 13،112 މީހުންނަށް ލިބެއެވެ. އޭގެ ތެރެއިން 6،703 މީހުންނަކީ ފިރިހެނުންނެވެ. އަދި 6،409 މީހުންނަކީ އަންހެނުންނެވެ.