ޚަރަދު ކުޑަކުރަން ހަފްލާތައް ނުބާއްވަން އެންގުމަށްފަހު ހުރިހާ ކައުންސިލް ރައީސުން މާލެ ގެނެސް އިފްތިތާހުކުރި "ނާރެސް" ޕޯޓަލްއިން ފޯރުކޮށްދޭ ޚިދުމަތަކީ އަލަށް ތައާރަފްކުރި ޚިދުމަތެއް ނޫންކަން ހާމަވެއްޖެއެވެ.

ހުކުރު ދުވަހުގެ ރޭ އިފްތާހު ކުރި "ނާރެސް" ޕޯޓަލްއާ ގުޅޭ ގޮތުން ދާޚިލީ ވަޒީރު އަލީ އިހުސާން ވިދާޅުވީ، "ނާރެސް" ޕޯޓަލް މެދުވެރިކޮށް މެދުވެރިކޮށް ކައުންސިލްތަކަށް އައިޑީކާޑްގެ ސްޓޭޓަސް ބެލުމާއި މާލެއެކޭ އެއްފަދައިން އައިޑީ ކާޑް ދޫކުރުން އަދި އެޕްލިކޭޝަންތައް ބަލައިގަތުމަށް ހިދުމަތް ލިބިގެންދާނެކަމަށެވެ. އަދި ނާރެސް ޕޯޓަލްއާއެކު ކޮންމެ ކައުންސިލަކަށް 10 އިނގިލީގެ ނިޝާން ނަގާ ފިންގާ ޕްރިންޓް ޑިވައިސްތަކެއްވެސް ހަވާލުކުރެވިގެންދާނެކަމަށާއި މިކަންވެގެންދާނީ ކައުންސިލްތަކާ ޑީއެންއާރާ ދެމެދު އޮތް ގުޅުން އިތުރަށް ބަދަހިވެގެންދާނެ ކަމެއްކަމަށް ވެސް ވިދާޅުވިއެވެ.

މި ވާހަކަތަކާ ގުޅިގެން އައިޑީކާޑު ޔުނިޓުގައި ވެރިއެއްގެ ގޮތުގައި ކުރިން މަސައްކަތް ކުރެއްވި މަރިޔަމް ވަހީދާ އޭނާގެ ފޭސްބުކް އެކައުންޓުގައި ކުރެއްވި ޕޯސްޓެއްގައި ވަނީ، އައިޑީ ކާޑު ހެދުމަށް ނާރެސް ޕޯޓަލް ބޭނުން ކުރުމަކީ ކައުންސިލްތަކުން އަލަށް ފެށި ކަމެއް ނޫން ކަމަށާއި، އެކަން ފަށާފައިވަނީ އޭނާ އެޑިޕާޓްމެންޓްގެ ވެރިއަކަށް ހުންނެވި އިރު ކަމަށް ވިދާޅުވެފައެވެ. އަދި ރާއްޖެއިން ބޭރުގައި ހުރި، ރާއްޖޭގެ ބައެއް އެމްބަސީތަކުންވެސް އެ ޚިދުމަތް ދޭން އޭރު ފަށާފައިވާކަމަށް ކަމަށް އޭނާ ވިދާޅުވެފައިވެއެވެ.

ހަމަ އެހެންމެ މާކުރިން ފަށާފައިވާ މަސައްކަތްތަކަކީ މިސަރުކާރުގެ މަސައްކަތުގެ ގޮތުގައި ލޭބަލް ކުރުމަކީ ދެރަ ކަމެއްގެ ގޮތުގައި މަރިޔަމް ވަހީދާ ސިފަކުރައްވާފައިވެއެވެ.

މީގެ އިތުރުން، އޭނާ އެ ޑިޕާޓްމެންޓްގައި ކުރީ ސަރުކާރުގައި އުޅުނު އިރު މި މަސައްކަތް ކުރުމަށް، ކައުންސިލްތަކަށް ލެޕްޓޮޕް ތަކާއި، ފިންގަރޕްރިންޓް މެޝިން ތަކާއި، ކެމެރާ ދީފައިވާ ކަމަށާއި، އަދި ކައުންސިލްތައް މި ޚިދުމަތް ދިނުމަށްޓަކައި ސަރުކާރުން އޭރު ވައިފައި ވެސް ކޮށްފައިވާ ކަމަށް އޭނާ ވިދާޅުވެފައިވެއެވެ.

އެހެންކަމުން މިއީ އެމަނިކުފާނުގެ ސަރުކާރުން ކައުންސިލްތަކަށް ކޮށްދިން ކަމެއް ކަމަށް ވިދާޅުވެ ރައީސް މުއިއްޒު ހުކުރު ދުވަހުގެ ރޭގެ ހަފްލާގައި ހެއްދެވީ އިތުރުފުޅެއްކަން މިވަނީ ހާމަވެފައެވެ.