އަންނަ ނޮވެމްބަރު މަހު ބޭއްވުމަށް ހަމަޖެހިފައިވާ އެމެރިކާގެ ރިޔާސީ އިންތިހާބުގައި އެ ގައުމުގެ މިހާރުގެ ރައީސް ޖޯ ބައިޑަން ވާދަނުކުރައްވަން ނިންމަވައި އެކަން އިއުލާން ކުރައްވައިފިއެވެ.
ބައިޑަން 81، ގެ ރިޔާސީ ކެމްޕެއިން ނިންމަވާލެއްވީ އޭނާގެ ނަފްސާނީ ދުޅަހެޔޮކަމާ މެދުގައި ސުވާލު އުފެދި، ވާދަވެރި ރިޕަބްލިކަން ޕާޓީގެ ކެންޑިޑޭޓު އަދި އެމެރިކާގެ ކުރީގެ ރައީސް ޑޮނާލްޑް ޓްރަމްޕް ބަލި ކުރެއްވުމުގެ ގާބިލްކަމާ މެދުގެ އޭނާ ނިސްބަތްވެވަޑައިގަންނަވާ ޑިމޮކްރެޓުންގެ އިތުބާރު ގެއްލިފައި ވަނިކޮށެވެ.
އެމެރިކާގެ ރައީސްކަން އެންމެ ދޮށީ އުމުރުގައި ކުރެއްވުމުގެ ޝަރަފް ވެސް ލިބިވަޑައިގެންފައިވާ ބައިޑަން އެކަން އިއުލާން ކުރެއްވީ ބައިޑަން ރިޔާސީ ރޭހުން ވަކިވާން 30 އަށް ވުރެ ގިނަ ކޮންގްރެސް މެމްބަރުން ޕްރެޝަރު ކުރައްވަމުން ގެންދެވި ދަނޑިވަޅެއްގައެވެ. ބައިޑަން ރިޔާސީ ރޭހުން ވަކިވެވަޑައިގަތުމަށް އެމެރިކާގެ ވަރަށް މަތީ ލެވެލްގެ ބޭފުޅުން ވެސް ގެންދެވީ އެދިވަޑައިގަންނަވަމުންނެވެ. އޭގެ ތެރޭގައި ކުރީގެ ގާނޫނު ހަދާ މަޖިލިހުގެ ރައީސް ނޭންސީ ޕެލޯސީ ވެސް ހިމެނިވަޑައިގަންނަވައެވެ.
ބައިޑަން އަށް އެންމެ ފުރަތަމަ ފާޑު ކިއުން އައީ މި އަހަރު ބޭއްވި ރިޔާސީ ބަހުސްގައި ވާހަކަ ދައްކަވަން އުނދަގޫވެގެންނެވެ.
ބައިޑަން ނެރުއްވި ބަޔާނެއްގައި ވިދާޅުވީ އޭނާގެ ވެރިކަމުގައި މިވީ ތިން އަހަރާއި ބައިގެ ތެރޭގައި އެމެރިކާ މި ފަހުގެ ތާރީހުގައި ނުދެކޭ ހަރުފަތްތަކަކަށް ގެންދެވިފައިވާ ކަމަށެވެ. އެގޮތުން، ދުނިޔޭގެ އެންމެ ވަރުގަދަ އިގްތިސާދު އޮތް ގައުމަށް އެމެރިކާ ވެފައިވާ އިރު، އެމެރިކާގެ ކުރިއެރުމަށް ގިނަ އިންވެސްޓްމަންޓުތަކެއް ކުރެއްވި ކަމުގައި ބައިޑަން ވިދާޅުވިއެވެ.
ނަމަވެސް ދެވަނަ ދައުރަކަށް ކުރިމަތިލެއްވުމުގެ ބަދަލުގައި މަސައްކަތް ކުރައްވާނީ މިހާރު ހިނގަމުން އަންނަ ދައުރުގައި އަދާކުރައްވަން ޖެހިވަޑައިގަންނަވާ މަސްއޫލިއްޔަތުތަކާއި ވާޖިބުތައް އަދާ ކުރެއްވުމަށް ކަމަށް ވެސް ބައިޑަން ވިދާޅުވިއެވެ.
