ނޫސްވެރިންނާ ގާތުން މަސައްކަތްކުރާނެ ކަމަށް ބުނި ސަރުކާރުން ނޫސްވެރިންނާ ބައްދަލުނުކުރާތާ 50 ދުވަސް ވެފައިވާކަން ހާމަވެއްޖެއެވެ.
ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގެން ނޫސްވެރިންނާ ބައްދަލުކުރެއްވުމަށް ބޭއްްވި ނޫސްވެރިންގެ ގުންޒަރުގައި ވިދާޅުވެފައިވަނީ މި ސަރުކާރަކީ ނޫސްވެރިންނަށް އެްއްވެސް ކަމެއް ނުފޮރުވާ ނޫސްވެރިންނާ އެންމެ ގާތުން މަސައްކަތްކުރާނެ ސަރުކާރަށް ވާނެ ކަމަށެވެ.
މި ސަރުކާރުގެ އިސް ތަރުޖަމާނު ހިނާ ވަލީދު މަގާމާ ހަވާލުވެވަޑައިގެން ބޭއްވި ފުރަތަމަ ނޫސްވެރިންގެ ބައްދަލުވުމުގައި އެޕްރިލު މަހުގެ 28 ގައިވެސް ވަނީ އެ ވާހަކަތައް ތަކުރާރު ކުރައްވާފައެވެ. އަދި ރައީސް އޮފިހުގެ ފަރާތުން ކޮންމެ ހަފްތާއަކު އެއް ފަހަރު ނޫސްވެރިންނާ ބައްދަލުކުރާނެ ކަމަށް ވިދާޅުވިއެވެ.
ނަމަވެސް ރައީސް އޮފީހުން އެންމެ ފަހުން ނޫސްވެރިންގެ ބައްދަލުވުމެއް ބޭއްވީ ޖޫން 2، ގައި ހޯމް މިނިސްޓަރު އަލީ އިހުސާން އިސްކޮށް ހުންނަވާއެވެ. އެ ބައްދަލުވުމަކީ އިޒްރޭލު ޕާސްޕޯޓު މަނާކުރަން ގާނޫނަށް ބަދަލު ގެންނަން އެ ދުވަހު ވަޒީރުންގެ މަޖިލީހުން ނިންމި ނިންމުން އިއުލާނުކުރަން ބޭއްވި ބައްދަލުވެމެކެވެ.
އޭގެ ފަހުން މިހާރު 51 ދުވަސް ވެފައިވާ އިރު ރައީސް އޮފީހުން ނޫސްވެރިންގެ ބައްދަލުވުމެއް އިއުލާނުކޮށް ބާއްވައިފައެއް ނުވެއެވެ. މިދިޔަ އަހަރުގެ ޑިސެމްބަރު މަހުގެ 23 ގެ ފަހުން ރައީސް މުއިއްޒުގެ ހިލަމެއްވެސް ނޫސްވެރިންނަށް ނުވެއެވެ.
