ބަލްކްކޮށް ޔޫރަޕުން ރާއްޖެއަށް ބޭސް ގެނައުމުގެ އެއްބަސްވުމުގައި ޔޫއެންޑީޕީއާއި ރާއްޖެއާ ދެމެދު ސޮއިކުރީ 01 ޖޫން 2023 ގައެވެ. ރާއްޖޭން އެ އެއްބަސްވުމުގައި ސޮއިކުރެއްވީ ކުރީ ސަރުކާރުގެ މާލީ ވަޒީރު އިބްރާހީމް އަމީރެވެ.

ޔޫރަޕުން ރާއްޖެއަށް ބޭސް ގެނަން ނިންމީ ނިމިދިޔަ ރައީސް ސޯލިހުގެ ވެރިކަމުގައިކަމީ އެއްވެސް މީހަކަށް ނޭނގޭ ކަމެއް ނޫނެވެ. ސާބިތު ހެކި ހުރީ ފެންނަންށެވެ.

ޔޫއެންޑީޕީއާއި ދިވެހި ސަރުކާރާ ދެމެދު ވެވުނު އެއްބަސް ވުމަށްފަހު މާގިނަ ދުވަހެއް ނުވެ އެސްޓީއޯއަކީ އިގިރޭސިވިލާތުގެ އެސްޓްރާ ޒެނެކާގެ ޑިސްޓްރިބިއުޓަރަށް ވެގެން ދިޔައެވެ. އެސްޓީއޯ އާއި އެސްޓްރާ ޒެނެކާ ވެވުނު އެއްބަސްވުން ދަށުން އެކުންފުނީގެ 14 ބޭހެއް ރާއްޖެއަށް ފޯރުކޮށްދޭން ނިންމިއެވެ.

ރާއްޖެއަށް ބަލްކްކޮށް ގެންނަ ކަމަށް މި ސަރުކާރުން އެ ބުނާ 7 ބޭހަކީ އެސްޓްރާ ޒެނެކާގެ ޑިސްޓްރިބިއުޓަރަށް ވުމުން ފޯރުކޮށްދޭން އެއްބަސްވެފައިވާ 14 ބޭހުގެ ތެރޭގައި ހިމެނޭ ހަތް ބޭހެކެވެ.

ކަންކަން އޮޅުވާލާ ދޮގުހެދުމުގައި މި ސަރުކާރުން އުޅޭތީ ހާދަހާވާ ދެރައެވެ. މި ސަރުކާރު ވެރިކަމަށް އައީ ރައީސް ޞޯލިހުގެ ސަރުކާރުން ރައީސް އަބްދުﷲ ޔާމީން އަބްދުލްގައްޔޫމްގެ ޒައާމަތުގައި ކޮށްދެއްވާފައިވާ ކަންކަމުގެ ކްރެޑިޓް ނަންގަވަމުން ގެންދަވާތީ އެކަމަށް ފާޑުވިދާޅުވެ ޕޯޑިއަމްތަކުގައި އެ ވާހަކަ އަޑުގެ ނެއްކޮޅަށް ދެއްކުމަށްފަހުގައިއެވެ.

މިހާރު ދެން މި ބައި މީހުންނަށް ވެރިކަން ލިބުނީމާ ކުރީ ސަރުކާރުން އުޅުނުހާ ގޮަތަކަށް އުޅޭތީ ދެރައެވެ. ކުރީ ސަރުކާރުން މަޝްރޫޢުތައް ހުއްޓާ، ސިޔާސީ ވަޒީފާތައް އިތުރުކޮށް، ކުންފުނިތައް ބަނގުރޫޓުކޮށް، މުޅި ރާއްޖޭގެ އިގްތިޞާދީ ހާލަތު އަނދަވަޅަކަށް ވައްޓާލުމުން އެކަންކަން ރަނގަޅު ކުރަން އައި ވެރިން ވެސް މި ފެންނަނީ އެ ޒާތައް އުޅުއްވާ މަންޒަރެވެ.، އާދެ، ކުރީ ސަރުކާރަށް އަދިވެސް އެއްޗެހި ކިޔައެވެ. އެކަމެއް ބަދަލެއް ނުވެއެވެ. އެެއްޗެހި ކިޔާފައި ކޮންމެ ފަހަރަކު ކުރީ ސަރުކާރު ބޮލަށް ކަނޑާލިޔަސް ކަންކަން ހައްލެއް ނުވާނެއެވެ.

ކުރީ ސަރުކާރަށް ޕޯޑިއަމްތަކުގައި ހަޅޭއްލަވަފައި އައިސް އެ ވެރިން ކޮށްފައިވާ ކަންކަމުގެ ރިބަން ކަނޑާފައި މި ވެރިން ކުރި ކަމެކޭ ކީމާ މިއޮތީ ހަމަ ރަނގަޅަށް ވެސް ސޯޓު ބޭލިފައެވެ. ކިހާ ލަދުވެތި ދެއްތޯ؟ ދެން ވެސް ސަރުކާރުގެ ނައިބު ވަޒީރުން ޓްވީޓް ކުރުމުގެ ކުރިން ހޯމް ވޯކް ހަދާލުން ރަނގަޅެވެ. އެހެން ނޫނީ ދެން ފެނިގެން ދާނީ މިޔަށްވުރެ ހަޑިކޮށް ކުރީ ސަރުކާރުން މި ސަރުކާރު ބޭޒާރުކޮށްލާ މަންޒަރެވެ.

ކުރީ ސަރުކާރުތަކުން ކޮށްފައިވާ ކަންކަމުގެ ކްރެޑިޓް ނެގުމަކީ "އައްޗި" ކަމެކޭ ކިޔާފައި ވެރިކަމަށް އައުމުން އައްޗި ކަންކަން ތިއްތިވުމަކީ މައްސަލައެކެވެ.ބަލްކްކޮށް ޔޫރަޕުން ރާއްޖެއަށް ބޭސް ގެނައުމަކީ އަދި އެންމެ ކަމެކެވެ. ކުރީ ސަރުކާރުން ކޮށްފައިވާ އެތައް ކަމެއްގެ ކްރެޑިޓް ނަގައި ރިބަން ކަނޑާ މަންޒަރުގެ ވާހަކަ ދައްކާ މީހުން މުޅި މީސްމީޑިޔާގައި އެބައުޅެވެ.

އަސްތާ، ތިހެން އުޅެނިކޮށް ރާކަނި މަސް ކެވިދާނެއެވެ.