ދިވެހިން ސިޔާސީ ގޮތުން މިނިވަންވުމަށް ފަހުގައި 59 އަހަރު ވީއެވެ. ސިޔާސީ މިނިވަންކަމަކީ، ދައުލަތުގެ ސިޔާދަތު ކަށަވަރު ވެގެން ވާ ހާލު، އެ ދައުލަތެއްގެ ރައްޔިތުންގެ ފަރާތުން، ރައްޔިތުންގެ ނަންމަތީގައި، ރައްޔިތުންގެ އަގީދާތަކާއި ރައްޔިތުން ގަބޫލު ކުރާ ފަލްސަފާތަކާއި އަގުތަކާ އެއްގޮތަށް، ދައުލަތުގެ ދާޚިލީ އެންމެހައި ކަންކަން ހިންގުމާއި، އެ ދައުލަތެއްގެ ޚާރިޖީ އެންމެހައި ގުޅުންތަކާއި މުއާމަލާތްތައް ވެސް މި ދެންނެވި ބީދައިން ކުރިޔަށް ގެންދިއުމުގެ ފުރިހަމަ ބާރާއި އިޚްތިޔާރު، ފުރިހަމަ މާނައިގައި، އެ ދައުލަތަކަށް ލިބިފައި އޮތުމެވެ.

މި ކަންކަމުގައި ބިދޭސީ އެއްވެސް ފަރާތެއް ނުވަތަ އެހެން ދައުލަތެއްގެ އަމުރާއި ކިޔަމަނުގެ ދަށުގައި ނުވަތަ ސިޔާދަތީ އަދި ޤާނޫނީ އިޚްތިޞާޞުގެ ދަށުގައި އެއްވެސް ސިފައެއްގައި، އެއްވެސް މިންވަރަކަށް އެ ދައުލަތް ނެތުމަކީ ވެސް މިނިވަން ކަމެވެ.

އިގުތިސާދީ ބާރުވެރިކަމަކީ ދައުލަތެއްގެ ނިސްބަތުގައި އަދި ފަރުދެއްގެ ނިސްބަތުގައި ވެސް ވަރަށް މުހިއްމު ކަމެކެވެ. އަޅުވެތިކަމުގެ ތެރެއިން ދިވެހިން ނުކުމެ، އެއްވަނަ ދުނިޔޭގެ ގައުމުތަކާއި އެކީ ބައިނަލް އަގުވާމީ އެކި އެކި ޖަލްސާތަކުގައި ދިވެހިންގެ ބަސްވިކޭ ބަޔަކަށް ވެގެން ދިއުމަކީ އިގުތިސާދީ ގޮތުން ރާއްޖެ ކުރާ މަސައްކަތުގެ ނަތީޖާއަކަށް ވެގެން ދިއުމެވެ. އަދި ގައުމެއްގެ އިގްތިސާދީ ސިޔާސަތުތަށް ބައްޓަން ކުރަންޖެހޭނީ ޖަޒުބާތުގެ މައްޗަށް ނުވަތަ ވަކިބައެއްގެ އަމިއްލަ މަސްލަހަތަށް ބުރަ ނުވެ ދުރު މުސްތަގުބަލަށް ވިސްނުމުގެ އިތުރުން ގައުމީ ތަސައްވަރެއް އޮވެގެން އެމިސްރާބަށް ދަތުރުކުރުމަށެވެ. މިނިވަން ކޮންމެ ގައުމަކަށްވެސް، އެގައުމެއްގެ ކަންކަން ހިންގުމުގައި ފުރިހަމަ ސިޔާދަތު އޮތުމުގެ ހައްގަކީ މިނިވަން ގައުމުތަކުގެ މެދުގައި ޞުލްޙަމަސަލަސްކަން ގާއިމްވެ އޮތުމުގެ އެންމެ މައި އަސާސް ކަމަށް ވީއިރު، ކޮންމެ ގައުމަކަށްވެސް އެ ގައުމެއްގެ ރައްޔިތުންނަށް ހެވާއި ލާބަ ހުރިގޮތްތައް ކަނޑައެޅުމާއި އަދި އިގްތިސޯދީ ގޮތުންނާއި، އިޖުތިމާޢީ ގޮތުންނާއި، ސިޔާސީގޮތުން ތަރައްގީ ކުރުމާއި، އިންސާނީ ހައްގު ކުރިއެރުވުމުގެ ހައްގު ކޮންމެ ގައުމަކަށް ވެސް ލިބިގެންވެއެވެ.

މިއީ ވޭތުވެ ދިޔަ ފަސް އަހަރު އަޅުގަޑުމެން ގިނަ ދިވެހިން ތަކުރާރުކޮށް ކިޔަމުން އައި ބަންޖެކެވެ. އެހެންކަމުން އޭރު އޮތް ޖަޒީރާ ރާއްޖޭގައި މިނިވަންކަން ނުރައްކަލަށް ހުށަހެޅިފައި އޮތްއޮތުން ނިމުމަކަށް ގެންނަން ދިވެހިރާއްޖެއަށް ދިވެހިން މިސްރާބު ޖެހިއެވެ. އޮޑިވެރިޔާ ބަދަލުކޮށް އައު ފަޅުވެރިންނާ އެކު އަމާން ދަތުރަކަށް އުއްމީދުކޮށްގެންނެވެ. ކަންވީއެހެންތޯއެވެ. ނޫނެކެވެ. އިންޑިއާ އައުޓު ގޮވަމުން މާރިޔާ ދީދީ ގައުމު ދެ ބިހާ ބިރިޔާނީ ތައްޓަކަށް ގައުމު ވިއްކާލައިފިއޭ ކިޔާ ގޮވަމުން އައިސް މިފެންނަނީ އަލުން ހަމަ އެ ބިރިޔާނީ ކައްކާ ކުނި ބިސްތަކަކަށް ގައުމުގެ މިނިވަންކަން ވިއްކާލާ މަންޒަރެވެ.

ސަލާމުގެ ނާށިގަޑު ހިފައިގެން ދިވެހިން އެހެން ބާރެއްގެ ދަށުގައި ބޭއްތިބުމަށް ހަމަ ތާރީޚު އިޔާދަވަމުންދާ މަންޒަރެވެ. ރަހުމަތްތެރިކަމާއި ޚާރިޖީ ސިޔާސަތުގެ ނަމުގައި އިންޑިއާއިން އެތައް ލޯނެއް ނަގައި ގައުމުގެ ދަރަނިވެރި ކޮށްފައި އޮތްއޮތުމަށް އިތުރު ބޮޅުތަކެއް އިތުރުވީއެވެ.

ބާނަ ބާނަ ތިއްބާ ވިއްކާލި ކަނޑުގެ މައްސަލަވެސް އޮތް ގޮތަށް އޮތީއެވެ. ބޭރުގެ އަސްކަރިއްޔާގެ ބޫޓު ކިބަތަކަށް ފައިވާން ކިބަތަކަށް ބަދަލުކޮށްލާ އެ އަސްކަރީންގެ ޔުނިފޯމު ކުލަ ހެދުމަށް ބަދަލުކޮށް ރައްޔިތުން ލޮލުގައި އަނދުން އެޅުވީއެވެ. ގޮތް ނޭނގޭ އެއްބަސްވުންތައް ހާމަކުރަން މަޖިލީހުގެ މެޖޯރިޓީ ދިނުމުންވެސް އެކަން ކުރަން ދެކޮޅު ހަދަނީއެވެ. ކީހާ ޅެން ފަރިއްސަށްވެ ވީހާ ވައުދު ކަދުރު ރުކަށް އެރި މީހާގެ ނަދުރަށްވެއްޖެއެވެ.

ރާއްޖޭގެ އެންމެ ކުދި ކުދި ކަންކަމުން ފެށިގެން ގޮސް އެންމެ ބޮޑެތި ކަންކަމަށް ވެސް އިންޑިއާގެ ނުފޫޒު އޮންނަ ކަމަށް އޭރު އެންމެ ބާރަށް އަޑުގަދަ ކުރި މީހުން މިއަދު ހަމަ އެކަންކަން ތަކުރާރުކުރަނީއެވެ. މެޑަލް ޖެހި ޕްރޯ މޯލްޑިވްސް ޚާރިޖީ ސިޔާސަތު ޕްރޯ ޕޮކެޓު އިންކަމްއަށް ބަދަވެއްޖެއެވެ.

ދިވެހި ގައުމިއްޔަތެއް ނެތެވެ. ހަގީގީ މާނައިގައި މިގައުމުގެ މިނިވަން ކަމެއްވެސް ނެތެވެ. ކުރިއަށް އޮތީ ގައުމިއްޔަތުގެ އަޅުވެތިކަމެވެ. ކުނި ދެ ބިހާ ބިރިޔާންޏަކަށް ބަޔަކު މީހުން ދޫކޮށްލި މިގައުމުގެ މިނިވަންކަން އަދިވެސް އޮތީ ހަމަ އެހެންނެވެ. ބަދަލުވީ އެ ބިރިޔާނީ ކައްކަން ތިބި ވެރިންނެވެ.