މިނިސްޓްރީ އޮފް ޑިފެންސްގައި މަސައްކަތް ކުރާ ސިޔާސީ މުވައްޒަފުންގެ އަދަދު ހާމަނުކޮށް ސިއްރުކޮށްފިއެވެ.

މައުލޫމާތޫ ހޯދައި ލިބިގަތުމުގެ ދަށުން "ތޭރަ އޮންލައިން" ގެ ފަރާތުން އެ މިނިސްޓްރީ އަށް ވާނީ އެ މިނިސްޓްރީގައި ތިބި ސިޔާސީ މުވައްޒަފުންގެ އަދަދާއި މުސާރާއިގެ ތަފްސީލް ހާމަކޮށްދިނުމަށް އެދި އާރްޓީއައި އެއް ހުށަހަޅާފައެވެ.

އެގޮތުން މި ނޫހުގެ ފަރާތުން އެ މިނިސްޓްރީގައި އެ މައުލޫމާތައް އެދިފައިވާނީ މެއި މަހުގެ 20 ވަނަ ދުވަހުއެވެ.

ދެމަހަށް ވުރެ ގިނަ ދުވަސްކޮށްފައި ޖަވާބު ދެއްވި އިރު އެ މިނިސްޓްރީ އިން ބުނީ ހޯދަން އެދިފައިވާ މައުލޫމާތަކީ އެ މިނިސްޓްރީގެ ވެބްސައިޓްގައި ޝާއިއުކޮށްފައިވާ މައުލޫމާތު ކަމަށެވެ.

ނަމަވެސް އެއީ ސީދާ ދޮގެެއްކަން އެ މިނިސްޓްރީގެ ވެބްސައިޓާއި ރައީސް އޮފީހުގެ ވެބްސައިޓަށް ބަލާލުމުން ހާމަވެގެންދެއެވެ.

އެގޮތުން މިނިސްޓަރުންގެ ނައިބުންގެ ތަފްސީލް ރައީސް އޮފީހުގެ ވެބްސައިޓްގައި ޝާއިއުކޮށްފައިވާއިރު އޭގައި ޑިފެންސް މިނިސްޓްރީގެ ދެ ނައިބު ވަޒީރުން ތިބޭކަމަށް ދައްކައެވެ.

ނަމަވެސް ޑިފެންސް މިނިސްޓްރީގެ ވެބްސައިޓުން ފެންނަނީ އެންމެ ޑެޕިޔުޓީ މިނިސްޓަރެކެވެ.

އޭގެއިތުރުން މުސާރާއިގެ ތަފްސީލް ވެބްސައިޓްގައި ނެތްއިރު އެ މައުލޫމާތު ވެސް އެ ވުޒާރާގެ ވެބްސައިޓުން ލިބޭނެކަމަށް ބުނެ ޑިފެންސް މިނިސްޓްރީ އިން މި ވަނީ އިތުރުފުޅުހަދާފައެވެ.

މައުލޫމާތު ހޯދައި ލިބިގަތުމުގެ ބާރުގެ ދަށުން ހޯދަން އެދޭ ގިނަ މައުލޫމާތު މި ސަރުކާރުން އަންނަނީ ފޮރުވަމުންނެވެ.