ރައީސް އިބްރާހިމް މުހައްމަދު ޞާލިހްގެ ސަރުކާރުން ގެއްލުވާލި ދެކުނުގެ ކަނޑުގެ ސަރަހައްދު ހޯދަން މި ސަރުކާރުން އުޅޭ މަންޒަރެއް ނުފެންނަކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ފްރޮންޓް އޮފީހުގައި ކުރިޔަށް ގެންދިޔަ ޖަލްސާގައި ޕީއެންއެފްގެ ރައީސް ޒެއިންއާ ސުވާލު އަމާޒުކުރައްވަމުންނެވެ.

އެގޮތުން އެމަނިކުފާނު ވިދާޅުވީ 59 ވަނަ މިނިވަން ދުވަސް ބައްދަލުކުރި އިރު ވެސް ކުރީ ސަރުކާރުން ގެއްލުވާލި ކަންޑުގެ ސަރަހައްދު ހޯދަން ކުރާ މަންޒަރު ފެންނަން ނެތްކަމަށެވެ.

ލީގަލް ވެއިޓެއް އޭގައި އޮތަސް ނެތަސް ދިވެހި ސަރުކާރުން އިޓްލޮސްގައި އެމީހުން ނިންމެވި ނިންމުން ބަލައި ނުގަންނަކަމަށް ވެސް ބުނެވެންޖެހޭނެކަމަށް ރައީސް ޔާމީން ވިދާޅުވިއެވެ.

ދިވެހި ސަރުކާރުން އެގޮތައް އިޓްލޮސްގައި ބުނާ ހިސާބުން އެ ކަނޑު އަނބުރާ ހޯދައިދެއްވާނެ ކަމުގެ ނިޔަތެއް ސަރުކާރުގައި އެބައޮތްކަން ރައްޔިތުންނަށް ސާބިތުވެގެންދާނެ ކަމަށް ވެސް ރައީސް ޔާމީން ވިދާޅުވިއެވެ.

އަދުގެ ސަރުކާރުގެ ވެރިންނަކީ ކުރީ ސަރުކާރުން އެ ކަނޑުގެ ސަރަހައްދު ވިއްކާލުމުން އެކަމާ ދެކޮޅަށް އެންމެ ބޮޑަށް އަޑު އުފުލާ ވަކާލާތު ކުރެއްވި ބޭފުޅުންނެވެ.

ނަމަވެސް ވެރިކަން ލިބުމުން އެ ކަނޑު އަނބުރާ ހޯދަން މަސައްކަތް ނުކުރައްވާތީ ރައީސް ޔާމީންގެ އިތުރުން އާންމުންވެސް އަންނަނީ ފާޑުކިޔަމުންނެވެ.