ރާއްޖޭގެ 59 ވަނަ މިިނިވަން ދުވަސް ފާހަގަކުރާއިރު ރާއްޖޭގައި އިންޑިއާ ސިފައިން ގާއިމުވެ ތިބޭތާ 14 އަހަރު ވެއްޖެ ކަމަށް ބުނެ ކުރީގެ ދާހިލީ ވަޒީރު އުމަރު ނަސީރު ކަންބޮޑުވުން ފާޅުކުރައްވައިފި އެވެ.

އުމަރު ނަސީރު މިފަދައިން ވިދާޅުވެފައި ވަނީ ފޭސްބުކްގައި ކުރެއްވި ޕޯސްޓެއްގައެވެ.

އެގޮތުން އޭނާ ވިދާޅުވީ އިންޑިޔާގެ އަސްކަރިއްޔާ ރާއްޖޭގައި ފައިހަރުކޮށްލިތާ 14 އަހަރާ، 4 މަހާ، 26 ދުވަސް ވެއްޖެކަމަށެވެ.

އުމަރު ވިދާޅުވީ އިންޑިޔާގެ އަސްކަރިއްޔާ ރާއްޖެއަށް އައީ 4 މާރިޗް 2010 ވަނަ އަހަރު، އޭރުގެ ސަރުކާރާ އެކު ހެދި 2 އަހަރު ދުވަހުގެ އެއްބަސް ވުމެއްގެ ދަށުން ކަމަށެވެ. އަދި އެ އެއްބަސް ވުމަށް 14 އަހަރު ފުރިގެން ދިޔައިރު އެމީހުންގެ އުޅަދުތަކާ، މީހުންގެ އަދަދު ދިޔައީ މައްޗައް ކަމަށާއި ރާއްޖޭގެ ކަނޑުން ބައެއް ގެއްލިފައިވާކަން ވެސް އުމަރު ފާހަގަކުރެއްވި އެވެ.

އެހެންކަމުން ﷲގެ ވާގިފުޅާއެކު އިންޑިޔާގެ އަސްކަރިއްޔާ ރާއްޖޭން ފޮނުވާލެވި، ފުރިހަމަ މިނިވަންކަމާ އަމިއްލަވަންތަ ކަމުގައި ދެމިއޮތުމުގެ ހެޔޮތައުފީގު ދިވެހީންނަށް ދެއްވުމަށް އެދި އުމަރު ވަނީ ދުއާ ކުރައްވާފަ އެވެ.

އިންޑިޔާ ސިފައިން މި ގައުމުން ފޮނުވާލި ކަމަށް އަދުގެ ސަރުކާރުން ދައުވާ ކުރި ނަމަވެސް ގިނަ ބަޔަކު ގަބޫލު ކުރާ ގޮތުގައި އަދިވެސް އެ ގައުމުގެ ސިފައިން މިގައުމުގައި އެބަތިއްބެވެ.