މި ދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީންގެ ޣައިރު ޤާނޫނީ ދައުލަތް އިސްރާއީލްގެ އަނިޔާވެރި އަސްކަރިއްޔާ އިން ފަލަސްތީނުގެ މިނިވަން ކަމަށް ޖިހާދުކުރަމުންދާ ހަމާސް ޖަމާއަތުގެ މުޖާހިދުންނާއި ދެކޮޅަށް ކަމަށް ބުނެ ޣައްޒާގައި ފަލަސްތީނުގެ އާންމު ރައްޔިތުންނާ ދެކޮޅަށް ހިންގަމުންދާ އަނިޔާވެރި ޤަތުލްއާންމު ހުއްޓުމެއްނެތި ދަނީ ކުރިއަށެވެ.

މިގޮތުން، ޚާން ޔޫނިސް ގައި ވަރުގަދަޔަށް ހަމަލާތައް ބަދަލު ކުރެވެމުންދާއިރު އެތަނުގައި އެތައް ސަތޭކާ ފަލަސްތީން މީހުން ތާށިވެ ނުރައްކައުތެރި ހާލަތުގައި ތިބި ކަމަށް އދ. ގެ އިންސާނީ އެހީތެރިކަމާ ބެހޭ އޭޖެންސީން ވަނީ އިއްޔެ ހާމަކޮށްފައެވެ.

ތާށިވެފައިތިބި މީހުން ސަލާމަތް ކުރުމަށް ޚާން ޔޫނިސް އަށް އެހީ ފޯރުކޯށްދޭ ފަރާތްތަކަށް ވަދެވޭނެ ހުރިހާ ގޮތްތަކެއް ބަންދުކޮށް އިޒްރޭލު ސިފައިން ހުރަސް އަޅާފައިވާކަމަށް ވެސް އެ އޭޖެންސީން ބުނެފައިވެއެވެ.

ގާޒާ ސްޓްރިޕްގައި ބަލިމަޑުކަމެއް ފެތުރިދާނެ ކަމުގެ ބިރު ހީވެފައިވުމާއި، ބަނޑުހައިހޫނުކަން އާންމު ވެފައިވުމާއެކު ވެސް ގާޒާ ސްޓްރިޕް އަށް ބޭނުންވާ އެހީ ފޯރުކޮށް ދިނުމުގައި އިޒްރޭލުން ގެންދަނީ ހުރަސް އަޅަމުން ކަމަށް އދ. ގެ އޮފިޝަލުން ވަނީ ބުނެފައެވެ.

އިޒްރޭލުގެ ހުރަސް އެޅުމުގެ ސަބަބުން އޭޕްރީލް މަހުން ފެށިގެން ގާޒާ ސްޓްރިޕް އަށް އެހީ ފޯރުކޮށްދޭވޭ މިންވަރު 56 އިން ސައްތަ ދަށަށް ގޮސްފައިވާ ކަމަށް ޔޫއެން އޮފީސް ފޯ ދަ ކޯޑިނޭޝަން އޮފް ހިއުމެނިޓޭރިއަން އޮފީހުން ބުނެފައިވެއެވެ.

ޚާން ޔޫނިސްގައި ތާށިވެފައި ތިބި މީހުން އެ ގޮތުގައި ތިބޭތާ ހަފްތާ އަކަށް ވުރެ ގިނަ ދުވަސް ވެފައިވާއިރު، ބޭހާ ކާނާ އާއި ބޯފެން އެތަނަށް ފޯރުކޮށްދެވޭނެ ގޮތެއް ނެތް ކަމުގައިވެސް އޮފިޝަލުން ބުނެފައިވެއެވެ.