ގޭގައި ކައްކާ ކާއެތިކޮޅުވެސް ދެނީ ބިދޭސީއެއް ކަމަށާއި އަންހެނުން ތިބެނީ ގޭގައި ކަސޯޓީ ބަލަންކަމަށް ހުޅުމާލޭ އުތުރު ދާއިރާގެ ޕީއެންސީ މެމްބަރު ހުސައިން ޝަރީފު ވިދާޅުވެއްޖެއެވެ.

ހުސައިން މިފަދައިން ވިދާޅުވީ ވަޒީފާއާ ބެހޭ ޤާނޫނަށް އިސްލާޙު ހުށަހެޅުމުގެ ބިލަށް ވާހަކަ ދައްކަވަމުންނެވެ.

އޭނާ ވިދާޅުވީ މިއަދު ހުރިހާ އިންޑަސްޓްރީއެއްގައި ބިދޭސީން އަތްގަދަ ކޮށްފައިވާ ކަމަށެވެ.

އޭގެ ތެރޭގައި މަސްވެރިކަމާއި، ވިޔަފާރިއާއި، ކެފޭތައް ހިމެނޭކަމަށެވެ.

އަދި މިއަދު ގޭގައި ކެއްކުމަށްވެސް އުޅެނީ ބިދޭސީންކަން އޭނާ ފާހަގަކުރެއްވިއެވެ.

ހުސައިން ވަނީ ދިވެހި އަންހެނުން މިއަދު ތިބެނީ މަސައްކަތެއް ނުކޮށް "ކަސޯޓީ" ބަލަންކަމަށް ވިދާޅުވެ އަންހެނުންނަށް ފާޑުވިދާޅުވެފައެވެ.


މިހާ ތަރައްގީވެފައި އޮތް ޒަމާނެއްގައި މެމްބަރު ހުސައިން އަންހެނުންނާ ދޭތެރޭ ގެންގުޅުއްވާ ވިސްނުމަށް ގިނަ ބަޔަކު އަންނަނީ ފާޑުކިޔުން އަމާޒުކުރަމުންނެވެ.

ވަޒީފާއާ ބެހޭ ޤާނޫނަށް އިސްލާހު ގެނައުމުގެ ބިލަށް ބަހުސް ކުރެއްވި ގިނަ މެމްބަރުން ވަނީ ބަންގްލަދޭޝުން އެއް ލައްކަ މީހުން ގެނެވޭ ގޮތަށް ހަދާފައި އޮތް އޮތުން ނިމުމަކަށް ގެނެސް އެ ލިމިޓު އުވާލުމަށް ގޮވާލާފައެވެ.