ރައީސް ޑރ. މުހައްމަދު މުއިއްޒުގެ ސަރުކާރަށް އެމްއެމްޕީއާރުސީގެ ބޮޑު ހިޔާނާތުގެ މައްސަލަ ބަލަން ނުކުރޭނެ ކަމަށް، ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ ދަ ފްރޮންޓު އޮފީހުގައި ހޯމަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުންނެވެ.

އެމްއެމްޕީއާރްސީގެ ބޮޑު ހިޔާނާތުން ގެއްލުނު ހުރިހާ ފައިސާއެއް ހޯދައި، އެ ވައްކަމުގައި ކޮންމެ މީހަކު ބައިވެރިވެފައި އޮތަސް އެމީހަކަށް އަދަބު ދެއްވާނެ ކަމަށް ރައީސް މުއިއްޒު ވިދާޅުވީ މި މަހުގެ ހަތްވަނަ ދުވަހުގެ ރޭ ޕީއެންސީ ހަރުގޭގައި ބޭއްވި ޖަލްސާއެއްގައެވެ.

ރައީސް މުއިއްޒުގެ ވާހަކަތަކަށް އިޝާރާތް ކުރައްވަމުން ރައީސް ޔާމީން ވިދާޅުވީ ރައީސް މުއިއްޒު ވެސް ހިމެނޭ ގޮތަށް މިހާރު ސަރުކާރު ހިންގަވަން ތިއްބެވި އިސް ބޭފުޅުންނަކީ އެމަނިކުފާނު ވަރަށް ދަންނަ ބޭފުޅުން ކަމަށެވެ.

އެމަނިކުފާނު ވިދާޅުވީ އެމްއެމްޕީއާރުސީގެ ހިޔާނާތުގެ ވާހަކަ ޕީއެންސީ ހަރު ގޭގައި ދެއްކުމުން އެ ހަރުގޭގެ ކުރީ ސަފުން މާޔޫސްކަން ފެނިގެން ދާކަމަށެވެ.

އެމްއެމްޕީއާރުސީގެ ފައިސާ ދައުރުވި ގޮތް ބަލައި، އެ ހިޔާނާތުގެ މުގުލުގައި ހުންނެވި ކުރީގެ ނައިބު ރައީސް އަހުމަދު އަދީބު މެދުވެރިކޮށް ލިބުނު މައުލޫމާތުތަކުން ފުލުހުންނަށް ފައިސާ ލިބުނު މީހުންގެ ލިސްޓެއް އެކުލެވިފައި އޮންނާނެ ކަމަށް ވެސް ރައީސް ޔާމީން ވިދާޅުވިއެވެ. އެ ލިސްޓު އާންމު ކުރުމަށް ރައީސް މުއިއްޒު ފުލުހުންނަށް އަންގަވަން ޖެހޭނެ ކަމަށް ވިދާޅުވިއެވެ.

ރައީސް ޔާމީން އިތުރަށް ވިދާޅުވީ، އެ މައްސަލަ ބަލަން ރައީސް ޑރ. މުހައްމަދު މުއިއްޒަށް ނުކެރޭނެ ކަމަށެވެ. މަޖިލީހުގެ ރައީސް އަބްދުލްރަހީމާއި ފޮރިން މިނިސްޓަރު މޫސާ ޒަމީރުގެ އިތުރުން ރައީސް މުއިއްޒަށް ވެސް ތުހުމަތުކުރާ ހިޔާނާތުގެ މައްސަލަތައް ގިނަ ކަމަށް އެމަނިކުފާނު ވިދާޅުވިއެވެ.

އެމްއެމްޕީއާރުސީގެ ބޮޑު ހިޔާނާތުގެ މައްސަލަ ބެލުމުގެ ނިޔަތް ރައީސް މުއިއްޒުގެ އޮތް ނަމަ މިނިވަން ކޮމިޝަނެއް އެކުލަވާލުމަށް ޔާމީން ގޮވާލެއްވިއެވެ.

ރައީސް ޔާމީން ވިދާޅުވީ، ރައީސް މުއިއްޒަށް ރައްޔިތުންގެ އިތުބާރު ގެއްލިފައިވާ ކަމަށެވެ.