ރައީސް މުހައްމަދު މުއިއެްޒު ނޫސްވެރިންނާ ބައްދަލުނުކުރައްވާތާ 200އަށް ވުރެ ދުވަސްވެއްޖެއެވެ.

ރައީސް މުއިއްޒަކީ ނޫސްވެރިންނާ ގާތުން މަސައްކަތްކޮށް ހާމަކަން ބޮޑުކޮށް ސަރުކާރު ހިންގަވާނެ ކަމަށް ވައުދުވެވަޑައިގެންނެވި ރައީސެކެވެ. އެގޮތުން އެމަނިކުފާނުގެ ސަރުކާރުގައި ހަފްތާއަކު އެއް ދުވަހު ނޫސްވެރިންގެ ބައްދަލުވުން ބާއްވާ ސަރުކާރު ހިންގަމުންދާ ގޮތުގެ ތަފްސީލު ދެއްވާނެ ކަމަށް ވެރިކަމަށް އައުމަށްފަހު ވިދާޅުވިއެވެ.

ނަމަވެސް އެމަނިކުފާނު ވެރިކަމަށް ވަޑައިގެން ނޫސްވެރިންނާ ބައްދަލުކުރެއްވީ ޖުމްލަ ތިން ފަހަރުއެވެ. އަަދި ރައްޔިތުންގެ ސުވާލުތަކަށް ޖަވާބުދޭން ފެއްޓެވި "އަހާ" ފޯރަމް ވެސް ދެ ބައްދަލުވުމަށް ފަހު އޮތީ ހުއްޓިފައެވެ.

މި ސަރުކާރުގެ އިސް ތަރުޖަމާނު ހިނާ ވަލީދު މަގާމާ ހަވާލުވެވަޑައިގެން ބޭއްވި ފުރަތަމަ ނޫސްވެރިންގެ ބައްދަލުވުމުގައި އެޕްރިލު މަހުގެ 28 ގައިވެސް ވަނީ އެ ވާހަކަތައް ތަކުރާރު ކުރައްވާފައެވެ.

ރައީސް އޮފީހުން އެންމެ ފަހުން ނޫސްވެރިންގެ ބައްދަލުވުމެއް ބޭއްވީ ޖޫން 2، ގައި ހޯމް މިނިސްޓަރު އަލީ އިހުސާން އިސްކޮށް ހުންނަވާއެވެ. އެ ބައްދަލުވުމަކީ އިޒްރޭލު ޕާސްޕޯޓު މަނާކުރަން ގާނޫނަށް ބަދަލު ގެންނަން އެ ދުވަހު ވަޒީރުންގެ މަޖިލީހުން ނިންމި ނިންމުން އިއުލާނުކުރަން ބޭއްވި ބައްދަލުވެމެކެވެ.

އެހެންވެސް ރައީސް މުއިއްޒު ނޫސްވެރިންނާ ބައްދަލުނުކުރައްވާތާ ވަނީ 200 އެތައް ދުވަހެއް ވެފައެވެ. މިދިޔަ އަހަރުގެ ޑިސެމްބަރު މަހުގެ 23 ގެ ފަހުން ރައީސް މުއިއްޒުގެ ހިލަމެއްވެސް ނޫސްވެރިންނަށް ނުވެއެވެ.