ނާއިންސާފާ ނުހައްގުން ކަންތައް ކުރާ މީހެއްގެ ފަހަތުގައި މަސައްކަތް ކުރަން ބޭނުން ނުވާކަމަށް ރައްޔިތުންގެ މަޖިލިސް އިންތިހާބުގައި ރައީސް އަބްދުﷲ ޔާމީން އަލަށް އުފައްދަވާ ޕާޓީ ޕީޕަލްސް ނެޝެނަލް ފްރޮންޓް (ޕީއެންއެފް)ގެ ފަރާތުން ހެންވޭރު ހުޅަނގު ދާއިރާއަށް ވާދަކުރުމުގެ ޝައުގުވެރިކަން ފާޅު ކުރައްވާފައިވާ ނާއިފް ޝައުކަތް ވިދާޅުވެއްޖެއެވެ.
ނާއިފް މިފަދައިން ވިދާޅުވެފައިވަނީ ޕީއެންއެފްގެ ޓިކެޓުގައި ރައްޔިތުން މަޖިލިހަށް ވާދަކުރުމަށް ޝައުގުވެރިކަން ފާޅުކުރައްވާފައިވާ ކެނޑިޑޭޓުން ތައާރަފް ކުރުމަށް ބުރާސްފަތި ދުވަހުގެ ރޭ ދަ ފްރޮންޓް އޮފީހުގައި ބޭއްވި ޖަލްސާގައި ވާހަކަ ދައްކަވަމުންނެވެ.
ނާއިފް ވިދާޅުވީ ނާއިންސާފާ ނުހައްގުން އަމަލުތައް ބައްޓަން ކުރާ މީހެއްގެ ފަހަތުގައި މަސައްކަތް ކުރަން ބޭނުން ނުވާކަމަށާ އަބަދުވެސް ހުންނާނީ ރައީސް ޔާމީންގެ ފަހަތުގައި ކަމަށެވެ.
އަޅުގަނޑު ގަބޫލެއް ނުކުރަން ނާއިންސާފާ ނުހައްގުން ކަންކަން ކުރާމީހެއްގެ ފަހަތުގައި މަސައްކަތް ކުރާކަށް. އެހެންވެ އަޅުގަނޑު އަބަދުވެސް މި ހުންނަނީ ރައީސް ޔާމީން ފަހަތުގައި.
ނާއިފް ޝައުކަތް
މީގެ އިތުރުން ނާއިފް ވިދާޅުވީ އޭނާއަކީ ޑީލަކަށް ވިކޭނެ މީހެއް ނޫން ކަމަށެވެ. އަދި ހަމައެހެންމެ ރައީސް ޔާމީނަށް ފުރަގަސް ދިންނަމަ އޭނާ މިއަދު ހުންނާނީ މިނިސްޓަރެއްގެ މަގާމުގައި ކަމަށްވެސް ނާއިފް ވަނީ ވިދާޅުވެފައެވެ.
