ފަސް އަހަރަށް ފަހު 20 ވަނަ ރައްޔިތުންގެ މަޖިލިސް އިންތިޚާބު މިއަހަރު ބޭއްވުމަށް ހަމަޖެހިފައިވާއިރު އިވިގެން ދަނީ އެކި އެކި ދިމާލުން އެކި އެކި އަޑުތަކެވެ.

އެގޮތުން އެއް އަޑު ކަންފަތުގައި ޖެހުނުގޮތަށް އަޅުގަނޑު މިއިނީ ހަމަ ބުނާނެ އެއްޗެއް ނޭނގިފައެވެ. 2023 ވަނަ އަހަރުގެ ރިޔާސީ އިންތިޚާބުގައި ޕީޕީއެމް/ޕީއެންސީ އަށް ވެރިކަން ހޯދައިދިނުމަށް ބަޔަކު މީހުން ވަރަށް ބުރަކޮށް މަސައްކަތްކުރިމަށް ނިންމާ މިއަހަރު ބޭއްވުމަށް ހަމަ ޖެހިފައިވާ ރައްޔިތުން މަޖިލިސް އިންތިޚާބުގައި މާފަންނު މެދު ދާއިރާ އާއި މާމިގިލި ދާއިރާ އަށާއި ދ.މީދޫ ދާއިރާއަށް އެ ކޯލިޝަންގެ ފަރާތުން އެއްވެސް ފަރާތެއް ވާދަނުކުރައްވާނެ ކަމަށް ޕާޓީގެ ޗެއާރ ޕާސަން "އިއްޔެ އަދު ރޭ" ވަނީ ނިންމާފައެވެ.

ރައްޔިތުން މަޖިލީހުގެ މާފަންނު މެދު ދާއިރާ އަށް ކުރިމަތި ލައްވަނީ ކާނަލް މުހައްމަދު ނާޒިމެވެ. ނާޒިމް ވަނީ ރިޔާސީ އިންތިޚާބުގެ ދެވަނަ ބުރުގައި ޕީޕީއެމް/ޕީއެންސީ އާއެކު ކޯލިޝަން ހަދާފައެވެ.ނާޒިމް ވަނީ ފުދޭ ވަރަކަށް ގިނަ މަސައްކަތްތަކެއް އޭނާގެ ޕާޓީގެ ފަރާތުން ކޮށްދެއްވާފައެެވެ. އެހެންކަމުން ނާޒިމަށް މާފަންނު މެދު ދާއިރާގެ ގޮނޑި ދެއްވުމަށްޓަކައި ކޯލިޝަންގެ ފަރާތުން ވާދަ ނުކުރައްވާނެކަމަށް ބުނުމުން ކޮންމެވެސް ވަރަކަށް އެވާހަކައިގައި ލޮޖިކެއް އެކުލެވެއެވެ.

އެހެންނަމަވެސް ދެން ހުރި ދެ ގޮނޑިއަށް ކޯލިޝަނުން ވާދަ ނުކުރައްވާނެކަމަށް އިއްޔެ އަދު ރޭ އިއުލާން ކުރުމުން ހިނި އަންނަނީ ބޭއިހްތިޔާރުގައެވެ.އެ ދެގޮނޑި އަށް ވާދަކުރައްވަން ނިންމައިގެން ހުންނެވި ގާސިމާއި، ސަން ސިޔާމް އަޅެ ހަމަ ޕާޓީ އަށް ކޮށްދެއްވީ ކޮންކަމެއްތޯ އަޅުގަނޑު ހިތަށް އަރައެވެ. ޕްރައިމަރީގައި ގިނަ ފަރާތްތަކަށް ވާދަ ނުކުރެއްވޭނެކަމަށް ބުނެ ސަބަބެއްކަމަށް ޕާޓީއަށް ހިދުމަތެއްކޮށްދެއްވާފައި ނުވެއޭ ވިދާޅުވެ ޗެއާ ޕާސަން އަދުރޭ ފޮނުވި ސިޓީ ތަކުގެ މަތިން އަޅުގަނޑު ހަނދާން އެބަހުރިއެވެ. ފަހުން އަދި ކުރިން ބުނި އެތި ކެންސަލްކޮށްލި ކަމުގައި ވީ ނަމަވެސް އެ ސިޓީތައް ނުފޮނުވާކަމަކަށް ނުހެދޭނެއެވެ.

ރިޔާސީ އިންތިޚާބު ގެ ދެބުރުގައި ވެސް ގާސިމް އާއި ސިޔާމް ދައްކާވެސް ނުލައެވެ. ޕީޕީއެމް/ޕީއެންސީ ގެ ލީޑާރޝިޕް އަށް ކޮށްދެއްވީ ގާސިމް ކޮންކަމެއްތޯ؟ ސަން ސިޔާމް ދެއްވީ ކޮން ފައިސާއެއްތޯ؟ ސުވާލުތަކަށް ޖަވާބެއް ދެވޭނެ ބާއޭ އަޅުގަނޑު ހިތަށް އަރައެވެ. ޕީޕީއެމް/ޕީއެންސީގެ ލީޑަރޝިޕެވެ..ވެރިކަމަށް ގެނެސްދިނުމަށްޓަކައި އެ ދެފަރާތުން ވީ ކޮން ގުރުބާނީއެއްތޯ؟