2023 ވަނަ އަހަރު ރިޔާސީ އިންތިހާބަށް ޕީޕީއެމް ޕީއެންސީއިން ނުކުތީ ރައީސް އަބްދުﷲ ޔާމީންގެ މެނިފެސްޓޯއާ ޝިއާރުވެސް ހިފައިގެންނެވެ.

"ދިވެހީންގެރާއްޖެ" ދިވެހިންނަށް ހޯދައިދިނުމަށެވެ. ދިވެހީން އެކަން ހިތުގެ އަޑިން ގަބޫލުކޮށް ޖަޒީރާ ރާއްޖޭގައި ދިރިއުޅުން ނިމުމަކަށް ގެނައީ 2023 ސެޕްޓެމްބަރު 30 ވަނަ ދުވަހުއެވެ.

އެއާއެކު 2023 ނޮވެމްބަރު 17 ވީ ހުކުރު ދުވަހު ހަވީރު ދިވެހީންގެ ރާއްޖޭގެ އޮޑި ކަނޑަށް ބޭލީ ނުހަނު ފަހި ދުވެލީގައި ދިވެހީންގެ ދަތުރު ފެށުމަށެވެ.

އެ ދަތުރަށް 8 މަސްވެގެން ދިޔައިރު ނަމަވެސް ފެންނަނީ ކަނޑުގެ ރާޅު ބާނީ ގަދަވެ އޮޑި ކަނޑަށް ނުކަތައިގެން އުޅޭ މަންޒަރެވެ. ލޯނާ ދަރަނީގެ ބިޔަ ރާޅޫތަކުގެ ތެރޭގައި ދިވެހީންގެ މާލިމީއަށް ހުންގާނުގައި ފަރިތަކަމާ އެކު ހިފަހައްޓާ ނުލެވިގެން އުޅޭ މަންޒަރެވެ. ފަޅުވެރިންގެ ނުހަނު ބުރަ މަސައްކަތުންވެސް ހުންގާނު ސީދާ ކޮށްނުލެވިގެން އުޅޭ މަންޒަރެވެ. ބާރަށް ފޮނު އަރުވާލާ ނުދުއްވިގެން އުޅޭ މަންޒަރެވެ.

އެއާއެކު ދަތުރުވެރިންގެ ހިތްހަމަ ނުޖެހުމާ ނުރުހުން ކައްޕިތާނަށް އަމާޒުވެ ފަޅުވެރިންގެ މެދުގައިވެސް ޚިޔާލު ތަފާތުވުން އުފެދިގެން އުޅޭ ވާހަކައިގެ އަޑުތަކެއްގެ ވެސް ގަދަވިއެވެ.

ކޮންމެ އަކަސް ދިވެހީންގެ ރާއްޖެ އަކީ ދިވެހީންގެ އެއްޗަކަށް ނުވެ ވަކި ވަކި ފަރުދުންގެ ރާއްޖެއަކަށް ވަމުންދާތީ އެކަމުގެ ހިތްހަމަ ނުޖެހުން ދަތުރުގެ ބައިވެރިންގެ ފަރާތުން ފެންނަން ފެށިއެވެ.

ގާނޫނު އަސާސީއިން ލިބިދީފައިވާ ޚިޔާލުފާޅުކުރުމުގެ މިިނިވަންކަމާ އިހުތިޖާޖުކުރުމުގެ މިނިވަންކަމުގެ ހައްގުގެ ބޭނުން ހިފާ ދިވެހީން ހައްގު ކަށަވަރުކުރަން މުޒާހަރާ ކުރާ މަންޒަރު ނޫން ދެވަނަކަމެއް މިހާރު މިރާއްޖެއިން ނުފެނެއޭ ބުނުމަކީ ދޮގަކަށް ނުވާނެއެވެ.

ސަރުކާރަށް 8 މަސްވީއިރު ފެނިގެންދަނީ ފްލެޓްވެރިން މުޒާހަރާ ކުރާ މަންޒަރާއި، ޓެކްސީ ޑްރައިވަރުންގެ މުޒާހަރާ އާއި، މަސްވެރިން މުޒާހަރާ ކުރާ މަންޒަރާއި، ރޭސްކާރު ދުއްވާ ކުދިންގެ މުޒާހަރާ ކުރާ މަންޒަރާއި ސައިކަލު ޓޯކުރާތީ މުޒާހަރާ ކުރާ މަންޒަރާއި ކަރަންޓު ބިލު ބޮޑުވެގެން ރައްޔިތުން މުޒާހަރާ ކުރާ މަންޒަރާ ސްކޫލުތައް އޭސީކުރަން ބެލެނިވެރިން އަތުން ފައިސާ ނަގާތީ މުޒާހަރާ ކުރާ މަންޒަރާ ވިޔަފާރިވެރިންނަށް ސަރުކާރުން ދޭން ހުރި ފައިސާ ނުދީގެން އެމީހުން މުޒާހަރާ ކުރާ މަންޒަރާ އަގަޔާ އަތާ ދިމާނުވާއިރުވެސް ޖީއެސްޓީ ބޮޑުކުރުމުން ރައްޔިތުން ނުުރހުން ފާޅުކުރާ މަންޒަރާ، ބޭރުގައި ކިަޔވާ ކުދިންނަށް ޑޮލަރު ކޮޅު ނުލިބިގެން މުޒާހަރާ ކުރާ މަންޒަރާ އާސަންދަ ފަދަ ޚިދުމަތްތައް އުނިކުރަތީ ނުރުހުމާ ޚާރިޖީ ސިޔާސަތު ގޮނޑި ކޮއްކޮ ސިޔާސަތަކަށްވުމުގެ ނުރުހުމާ މިހެން ގޮސް ކިޔާފައި ނުކިޔާނެ ކަމެއް ނެތެވެ. ހުސް މުޒާހަރާއެވެ. އަބޫބަކުރު ޗުއިން ގަމް ޗުއިންގަމް ގޮވިހެން މިއަދު މި ގޮވަން ޖެހެނީ މުޒާހަރާ މުޒާހަރާއެވެ.

މުޚި ގައުމުގައި މުޒާހަރާއެވެ. އެކަމަކުވެސް ސަރުކާރު ވަރަށް ކޫލުކަމަށް ވެއެވެ. ވާނީ ވެސް އެހެންތާއެވެ. ސަރުކާރުގެ ވެރިންނަށް ދަތިވާ އުނދަގޫ ވާކަމެއް ނެތް ވިއްޔާއެވެ.

ގައުމުގައި ނަޒަހަރު ހިންގާލި ކޮންމެ ދިމާއަކުން ފެންނަނީ މާޔުސްވެފައި ތިބި ރައްޔިތުންނެވެ. އުއްމީދު ގެއްލި މޮޅިވެރިކަމުގެ ސާލެއް ދެމިފައި އޮތް ގައުމެކެވެ. ބަނަކަމާ އަނދިރިކަމުގެ ތެރެއަށް ގައުމުގެ މުސްތަގުބަލު ދަތުރުކުރާ މަންޒަރެވެ. ދިވެހީންގެ ރާއްޖެ ބީވެ މުޒާހަރާ ރާއްޖެއަކަށް ބަދަލުވެ މުޅި ގައުމުގައި ސަރުކާރުގެ ނާގާބިލު ވާހަކައެވެ.