ރައީސް ޔާމީނަށް ނުހައްގުން އަނިޔާ ލިބެމުންދާތާ ޖެނުއަރީ 6 އަކަށް 1147 ދުވަސް، އަދިވެސް އެމަނިކުފާނުގެ އިސްތިއުނާފް މައްސަލައިގެ ހުކުމް އިއްވުމުގެ އަޑުއެހުން ތާވަލްކޮށްފައިނުވެއެވެ.


ރައީސް ޔާމީންގެ އިސްތިުނާފު މައްސަލައިގެ އަޑުއެހުންތައް ނިންމާލާފައިވަނީ މިދިޔަ އަހަރުގެ ނޮވެމްބަރު މަހުގެ 21 ވަނަ ދުވަހުއެވެ. އެ ދުވަހު ޚުލާސާ ބަޔާން ހުށަހަޅަން ދެ ފަރާތަށްވެސް ފުރުސަތު ދެއްވުމަށްފަހު ރިޔާސަތުން ވަނީ މައްސަލައިގައި ދެން އޮންނާނީ ހުކުމްގެ މަޖިލިސް ކަމަށް އިއުލާންކުރައްވާފައެވެ.

އެންމެ ފަހުގެ އަޑުއެހުމެއް ބޭއްވުނު ފަހުންވެސް ވަރަށް ގިނަ ދުވަސްތަކެއް ވެފައިވާއިރު އެމަނިކުފާނަށް ތާއިދު ކުރާ ފަރާތްތަކުން އަންނަނީ ކަންބޮޑުވުން ފާޅުކުރައްވަމުންނެވެ.

އެގޮތުން އައު އަހަރު ފެށުމުން އެމަނިކުފާނުގެ އިސްތިއުނާފް މައްސަލައިގެ ހުކުމް އިއްވުމުގެ އަޑުއެހުން ތާވަލް ކުރެވިގެންދާނެ ކަމަށް އެމަނިކުފާނަށް ތާއިދުކުރާ ފަރާތްތަކުން އަންނަނީ އުންމީދު ކުރަމުންނެވެ.

އެމަނިކުފާނުގެ އިސް ޤާނޫނީ ވަކީލް ޑރ.ޖަމީލް ވިދާޅުވީ ރައީސް ޔާމީންގެ އިސްތިއުނާފް މައްސަލައިގެ ހުކުމް އިއްވުމުގެ އަޑުއެހުމެއް އަދި މިހާތަނަށް ވެސް ނުބޭއްވިގެން ނުވަތަ ތާވަލް ނުކުރެވި މިހާދުވަސް މި ނަގަނީ ސަރުކާރުން ޝަރުއީ ނިޒާމަށް ނުފޫޒު ފޯރުވަމުން ގެންދާތީކަމަށެވެ.

ފްރީ ޕްރެޒިޑެންޓް ޔާމީން ޖައްސަވާފަ ހުރި ޓީޝާޓް ތުރު ކުރުއްވައިގެން މަގުމައްޗައް ނިކުމެ އަޑު އުފުލި ބޭފުޅުން މިއަދު ވެރިކަމުގައި ހުންނަވާ ރައީސް ޔާމީން މިނިވަން ނުކުރައްވާ ސަބަބު ހާމަ ނުވާކަމަށް ވެސް ޑރ.ޖަމީލް ވަނީ ފާހަގަކުރައްވާފައެވެ.

ރައީސް ޔާމީންއަކީ ރާއްޖޭގައި އެ ފަދަ ދެވަނަ އެއް ނެތް ސިޔާސީ މުފައްކިރެއް ކަމަށާ އެމަނިކުފާނުގެ ޚިޔާލާ މަޝްވަރާއަކީ ރާއްޖޭގެ ކަންކަން ބިނާކުރުމުގައި މުހިއްމު އެއްޗަކަށްވާނެކަމަށާ އެހެންކަމުން އައު ސަރުކާރު ހުވާކުރުމާ އެކު އެމނަިކުފާނު މިނިވަންވާނެ ކަމަށް މިހާރުގެ ރައީސް ޑރ. މުހައްމަދު މުއިއްޒު ވިދާޅުވިއެވެ. ނަމަވެސް ރައީސް މުއިއްޒު ހުވާ ކުރައްވާ އެއް މަސް ދުވަސް ވެގެން ދާއިރުވެސް ރައީސް ޔާމީންގެ މައްސަލައަށް ކުރިއެރުމެއް ނުލިބި އޮތުމަކީ އެމަނިކުފާނުގެ ފޮޓޯ ދައްކައިގެން އައި ވެރިކަމެއްގެ މުޅި އިސް ފަޑިއަށްވެސް ލަދު ހުތުރުކަމެއްކަމަށް ގިނަ ބަޔަކު ބުނެއެވެ.