އާދިއްތަ ދުވަހުން ފެށިގެން ކުރިއަށް އޮތް ފަސް ދުވަހަށް ރާއްޖެ އަށް މޫސުން ގޯސްވާނެތީ، ރައްކާތެރިކަމުގެ ފިޔަވަޅު އެޅުމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސްކޮށްފި އެވެ.

މެޓް އޮފީހުން، ހުޅަނގު މޫސުމުގެ ބާރު ގަދަވާނެ ކަމަށް ލަފާކޮށްފައިވުމާއެކު، ރާއްޖޭގެ ބޮޑުބަޔަކަށް ގުގުރުމާއެކު ވިއްސާރަކޮށް، ވިލާގަނޑުގައި ގަޑިއަކު 40 މޭލާއި 45 މޭލާ ދެމެދުގެ ބާރުމިނުގައި ވައިގަދަވެ ކަނޑުތައް ގަދަވާނެ ކަަމަށް ލަފާ ކުރެވޭ ކަަމަށް ހާމަކުރުމުން އެންޑީއެމްއޭ އިން ވަނީ މޫސުމަށް ތައްޔާރުވުމަށް އިލްތިމާސްކޮށްފައެވެ.

އެގޮތުން އެންޑީއެމްއޭއިން ނެރެފައިވާ އިރުޝާދުގައި ބުނެފައިވަނީ ރައްޔިތުންގެ މުދަލާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލާ މަސައްކަތް ކުރުމަށް އިލްތިމާސްކުރާ ކަމަށެވެ.

އެންޑީއެމްއޭއިން ދިން އިރުޝާދުގައި ބުނީ ވާރޭވެހި ފެންބޮޑުވެދާނެ ކަމަށް ތައްޔާރުވުމުގެ ގޮތުން ގޯތިގެދޮރަށް ފެން ނުވަންނާނޭހެން ގޭގޭގެ ދޮރުމަތީގައި ވެލިބަސްތާ ފަދަ ތަކެތި ޖެހުމަށް އިލްތިމާސް ކުރާ ކަމަށެވެ. އަދި، ގޭތެރޭގައި ފެންބޮޑުވެއްޖެ ހާލަތެއްގައި ގެއްލުންވެދާނެ ފަދަ މުދާ ފެން ނުޖެހޭ ފަދަ އުސް ތަންތަނަށް ބަދަލު ކުރުމާއި ގަދަވައިގެ ސަބަބުން ފުރާޅު އެއްލައިލިޔަ ނުދިނުމަށްޓަކައި ވައު ފަދަ އެއްޗަކުން ފުރާޅު އެއްލައިނުލާނެ ފަދަ ގޮތަކަށް ހައްޔަރު ކުރުމަށް އެންޑީއެމްއޭއިން އިލްތިމާސް ކޮށްފައިވެއެވެ.

އޭގެއިތުރުން، ބޭނުން ނުކުރާ ނަމަ ކަރަންޓުން ބޭނުން ކުރާ އާލާތްތައް ނިއްވާލާފައި ބެހެއްޓުމާއި ކަނޑުދަތުރު ކުރާ ފަރާތްތަކުން ދަތުރަށް ނުކުންނައިރު، ސަލާމަތީ ކަންކަމާއި މުވާސަލާތީ ނިޒާމު ފުރިހަމަ ކޮށްގެން މޫސުމަށް ބަލައިގެން ދަތުރު ކުރުމަށް ވެސް އެ އޮތޯރިޓީން އިލްތިމާސް ކޮށްފައިވެއެވެ.

ކާޑުގެ ބާވަތްތަކާއި ޒަރޫރީ ތަކެއްޗަށް ދަތި ނުވާނެ ގޮތަށް ދުރާލައި ކަންކަން އިންތިޒާމު ކުރުމަށް ވެސް އެންޑީއެމްއޭއިން އިލްމާސްކޮށްފައިވެއެވެ.

މީގެކުރިން މެޓުން ހާމަކުރި ގޮތުގައި މިހާރު ރާއްޖެއަށް ކުރަމުން ދަނީ ހުޅަނގު މޫސުމުގެ ވިއްސާރައެވެ.