ޖިނާއީ މައްސަލައެއް ތަހުގީގީ އިދާރާއަކަށް ހުށަހެޅުމުން އެ ތަހުގީގީ އިދާރާއަކުން އެ މައްސަލަ އެންމެ އެދެވޭ ގޮތައް ނުބަލާކަމަށް ހީވާނަމަ އެކަމުގެ ޝަކުވާ އޮންލައިންކޮށް ހުށަހެޅޭނެ ގޮތް ޕްރޮސެކިއުޓާ ޖެނެރަލްގެ އޮފީހުން ހަދައިފިއެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުން ބުނީ، މީހަކު ޖިނާއީ މައްސަލައެއް ތަހުގީގީ އިދާރާއަކަށް ހުށަހެޅުމުން، ތަހުގީގީ އިދާރާއިން އެމައްސަލަ ބަލާގޮތާމެދު ހިތްހަމަނުޖެހޭނަމަ، އެކަން ބަލައިދިނުމަށް އެދި ޕްރޮސެކިއުޓާރ ޖެނެރަލަށް ޝަކުވާ ހުށަހެޅިދާނެ ކަމަށް ޖިނާއީ އިޖުރާއަތުގެ ގާނޫނުގައި އޮންނަ ކަމަށެވެ.

އެގޮތުން ތަހުގީގު ކުރާ ގޮތާމެދު އެއްވެސް ފަރާތެއްގެ ޝަކުވާއެއް ވާނަމަ، އޮންލައިންކޮށް އެ ޝަކުވާ ހުށަހެޅޭނެ ނިޒާމެއް ޕީޖީން ތައާރަފްކޮށްފައިވާ ކަމަށާއި، އެ ޝަކުވާތައް ހުށަޅަން ޕީޖީ އޮފީހުގައި ޓެބެއް އޮންނާނެ ކަމަށްވެސް އެ އިދާރާއިން ވަނީ ހާމަކޮށްފައެވެ.

ޕީޖީ އޮފީހުން ބުނި ގޮތުގައި ޝަކުވާ ހުށަހަޅާ ޓޭބަށް ފިތާލުމުން ފެންނަ ފޯމުގެ ގިނަ ބައި ހުންނާނީ ފުރާފައި ކަމަށާއި، ޝަކުވާ ހުށަހަޅާ މީހާ ކުރަން ޖެހޭނީ ދެ ކަމެއް ކަމަށެވެ.

އެއީ އޭނާގެ ޝަކުވާއަކީ ކޮބައިކަމާއި، އޭނާ ތަހުގީގީ އިދާރާއަށް ހުށަހެޅި ލިޔުމުގެ ކޮޕީއެެއް އަޕްލޯޑް ކުރުމެވެ.ޕީޖީން ބުނި ގޮތުގައި އެ ޝަކުވާ ފޯމު ލިބޭނީ އެމައްސަލައެއް ބެލުމާ ހަވާލުވެހުރި ޕްރޮސެކިއުޓަރުގެ ސްކްރީނަށެވެ.

އޮންލައިންކޮށް ޝަކުވާ ހުށަހެޅޭގޮތް ހަދާފައިވީ ނަމަވެސް، ސީދާ ކަރުދާސް ފޯމުން ނުވަތަ ސިޓީއަކުން ޝަކުވާ ހުށަހަޅަން ބޭނުންވާ މީހުންނަަށް އެ ފުރުސަތު ކުރިއެކޭވެސް އެއްގޮތަށް އޮންނާނެކަމަށްވެސް ޕީޖީން ވަނީ ބުނެފައެވެ.