ކުރީގެ ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމަށް ހަމަލާދިނުމުގެ ތުހުމަތުކުރެވޭ 7 މީހުންގެ މައްޗަށް ދައުވާ އުފުލައިފިއެވެ.

ޕީޖީ އޮފީހުން ބުނީ މި މައްސަލައާއި ގުޅިގެން 7 މީހެއްގެ މައްޗަށް ދަޢުވާކުރުމަށް ކްރިމިނަލް ކޯޓަށް ހުށައަޅަފައިވާކަމަށެވެ.

މި ފަރާތްތަކަކީ؛

1. ރ. އަލިފުށި، ރިވެލި، މިދުޙަތު އާދަމް

2. ލ. ގަން، ތުނޑި، ޖަވާހިރުވިލާ، މުޙައްމަދު ޖަޒްލާން

3. ދަފްތަރު ނަންބަރު ދރ 2247، އަޙްމަދު މައިސާން ހާޝިމް

4. ލ. މާމެންދޫ، މުރިނގު، ރަޖުވާން ލަޠީފް

5. ތ. ގާދިއްފުށި، މުސްތަރީގެ، ޝަމާލް ޙުސައިން

6. ތ. ދިޔަމިގިލި، ރުވާ، އަބާން ޢަބްދުލްހަންނާނު

7. އދ. މާމިގިލި، ކެމީހިޔާ، ޒަޔާން ނަޞީރު

ޕީޖީ އޮފީހުން ވިދާޅުވީ މި މައްސަލާގައި މި މީހުންގެ މައްޗަށް އުފުލާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މަރާލަން އުޅުމުގެ ކުށުގެ ދަޢުވާކަމަށެވެ.

ޕީޖީ ޝަމީމަށް އަމާޒުކޮށް ހަމަލާދީފައިވަނީ މިދިޔަ ޖަނަވަރީ މަހުގެ 31 ވަނަ ދުވަހުއެވެ.

ޕީޖީ ޝަމީމަށް ދިން ހަމަލާގައި އެބޭފުޅާ ގެ ވާއަތްޕުޅުގައި ވަނީ ރެނދުލިއިރު، އެބޭފުޅާ އަށް ހަމަލާދީ ޒަހަމް ކޮށްލީ އެދުވަހުގެ ހެނދުނުގެ ވަގުތެއްގައި މާލެއިންނެވެ.

މި މައްސަލާއާ ގުޅިގެން ހައްޔަރުކުރި 7 މީހުން ތިބީ މިހާރުވެސް ބަންދުގައި ކަމަށް ފުލުހުން ވަނީ ހާމަކޮށްފައެވެ.