ޕްރޮސެކިޔުޓާރ ޖެނެރަލްގެ މަގާމުގައި ހުންނެވި ހުސައިން ޝަމީމް އެ މަގާމުން ވަކި ކުރުމަށް ނިންމާފައިވަނިކޮށް، މަގާމުން އިސްތިއުފާ ދެއްވައިފި އެވެ.

ޝަމީމް އިސްތިއުފާ ދެއްވާފައި ވަނީ އޭނާ މަގާމުން ވަކި ކުރުމަށްޓަކައި މަޖިލީހުގައި ޖަލްސާއެއް ކުރިޔަށްދަނިކޮށެވެ.

އެގޮތުން ޝަމީމްގެ އިސްތިއުފާ ސިޓީގައި ވަނީ މައްސަލަ ދިރާސާކޮށް، އެ ތުހުމަތުތަކާ ގުޅިގެން ޖަވާބުދާރީވުމަށްޓަކައި، މިއަދު ތާވަލު ކުރި އެ ކޮމިޓީގެ 19 ވަނަ ބައްދަލުވުން އާންމުކޮށް ހުޅުވާލައިގެން ބާއްވައި ދެއްވުމަށް ތަކުރާރުކޮށް އެދިފައިވަނިކޮށް މަޖިލީހުގެ ގަވާއިދުގައި ކޮމިޓީގެ ޖަލްސާތައް ސިއްރުކުރުމާބެހޭ ގޮތުން ހުރި އިޖުރާއަތުތަކާ ހިލާފަށް، އެ ކޮމިޓީގެ ޖަލްސާތައް ގެންދަވާފައިވާ ކަމަށްވެއެވެ.

މައްސަލައިގައި ޖަވާބުދާރީވުމަށް މިއަދު ޖުޑީޝަރީ ކޮމެޓީއަށް ވަޑައިގެން ޝަމީމް ވިދާޅުވީ އިތުބާރު ނެތްކަމަށް ބުނެ އެ ކޮމެޓީން ބަލަމުންދާ މައްސަލައަކީ އެއްވެސް އަސްލެއް ނެތް ތުހުމަތުތަކެއްގެ މައްޗަށް ބިނާކޮށް ބެލި މައްސަލައެއް ކަމަށެވެ.