ދައުރު ހަމަވާން ގާތްވެފައި ވަނިކޮށް، ޝަމީމް މަގާމުން ވަކި ކުރުމަށް ފާސްކޮށްފައިވަނިކޮށް، އެ ކަމަށް މަޖިލީހުގައި ވޯޓަށް އެހުމުގެ ކުރިން މަގާމުން އިސްތިުފާ ދޭނެ ކަމުގެ އިޝާރާތެއް ޕީޖީގެ މަގާމުގައި ހުރި އެމްޑީއެން ހުސެއިން ޝަމީމު ހާމަކޮށްފިއެވެ.

ޖުޑީޝަރީ ކޮމިޓީއަށް ޖަވާބުދާރީވުމަށް ފަހު ޕީީޖީ އޮފީހުގައި ބޭއްވި ނޫސްވެރިންގެ ބައްދަލުވުން ފައްޓަވަމުން ވެސް ޝަމީމް ވިދާޅުވީ އޭނާގެ މައްޗަށް އިތުބާރު ނެތް ކަމަސް ބުނެ ކުރާ ތުހުމަތުތަކަކީ އައުކަމެއް ނޫން ކަމަށެވެ. އެގޮތުން ކުރިގެ ޓުއަރިޒަމް މިނިސްޓަރު އަލީ ވަހީދުއާ ކުރީގެ ޔުތު މިނިސްޓަރު އަހުމަދު މަހުލޫފުގެ މައްޗަށް ކުރި ދައުވާތއް އަލުން އަނބުރާ ގެނައުމުން ކުރާ ތުހުމަތުތަކަށް އޭނާ އަލި އަޅުވާލައްވާފައެވެ.

ޝަމީމު ވިދާޅުވީ، މިއީ އިތުބާރު ނެތިގެން ހިނގާ ކަމެއް ނޫން ކަމަށާ މިއީ މުޅިން އެހެން ގޮތަަކަށް ހިނގާ ކަމެއް ކަމަށެވެ. އެއީ ރާއްޖޭގެ ކަންކަން އަދި ހިނގާ ގޮތް ކަމަށް ވިދާޅުވީ، އެކަމުގައި ޝަކުވާއެއް ވެސް ނެތް ކަމަށެވެ.

މީގެ އިތުރުން އޭގެ އިތުރުން ޝަމީމް ވިދާޅުވީ އޭނާގެ ގާނޫނީ ފަންނުގެ ދިގު ކެރިއަރުގައި ނަން ހަޑިވާނެ އެއްވެސް ކަމެއް ކޮށްފައިނުވާނެ ކަމަށެވެ. ނުފޫޒުގައި ޖެހެން ބޭނުން ނުވާ އެންމެ ބޮޑު ސަބަބަކީ ވެސް އެއީ ކަމަށް އޭނާ ވިދާޅުވިއެވެ.

ޝަމީމު އިސްތިއުފާދެއްވަފާނެ ތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން ވިދާޅުވެފައިވަނީ އޭނާ މަސައްކަތާއި ގުޅޭ ހުރިހާކަމެއް ދަސް ކުރެއްވީ ކުރީގެ ޕްރޮސެކިއުޓަރ ޖެނެރަލް އަހުމަދު މުއިއްޒުގެ ފަރާތުން ކަމަށެވެ. އަދި އެއަށް ވުރެ ތަފްސީލުކޮށް ދޭނެ ޖަވާބެއް ނެތްކަމަށާއި، އޭނާ އަމަލު ކުރާނީ މުއިއްޒުއާއި އެއްގޮތަށް ކަމަށެވެ.

ޝަމީމު މިފަދައިން ވިދާޅުވެފައިވާއިރު، 2013 ވަނަ އަހަރު ޕްރޮސެކިއުޓަރ ޖެނެރަލްގެ މަގާމުގައި ހުންނެވި މުއިއްޒު މަގާމުން އިސްތިއުފާ ދެއްވީ، އިތުބާރު ނެތްކަމުގެ މައްސަލައިގައި ވޯޓަށް އެހުމަށް ކުޑަތަންވެފައި ވަނިކޮށެވެ. އެހެންކަމުން ޝަމީމުވެސް އެ އިޝާރާތްކުރެއްވީ އެފަދައިން އަމަލުކުރައްވާނެ ކަމަށްކަން ފާހަގަކޮށްލެވެއެވެ.

ޝަމީމް މަގާމުން ވަކި ކުރުމަށް ހުށަހެޅީ އައްޑޫ ހުޅުދޫ ދާއިރާގެ ޕީއެންސީ މެމްބަރު މުހައްމަދު ޝާހިދެވެ. ޕީޖީ އޮފީހުގެ ބައެއް މަސައްކަތްތަކަށް ސުވާލު އުފައްދައި، ޝަމީމްގެ މައްޗަށް ކުރި ތުހުމަތުތަކުގެ އެ ސިޓީގައި އަށް ނުކުތާއެއް ފާހަގަކޮށްފައި ވެއެވެ.

އޭގެ ތެރޭގައި ހިމެނެނީ ކުރީގެ ޓުއަރިޒަމް މިނިސްޓަރ އަލީ ވަހީދަށް ކުރި ޖިންސީ ގޯނާގެ ދައުވާ ފައިލް ކުރުމާއި، ކުރީގެ ޔޫތް މިނިސްޓަރ އަހުމަދު މަހުލޫފްގެ މައްޗަށް ކުރި ރިޝްވަތުގެ ދައުވާ ފައިލް ކުރުން އަދި ހުޅުމާލޭގެ ފަޅު ތެރޭގައި އަޅާފައި އޮތް ސަފާރީއެއްގައި ބިދޭސީ އަންހެނަކު ރޭޕް ކުރި މައްސަލައެއްގައި އެމްޑީޕީއާއި ގާތް މީހަކު ހިމެނޭތީ އެ މައްސަލަ އިތުރަށް ކުރިޔަށް ނުގެންދިއުން އަދި މަޖިލީހުގެ ނިލަންދޫ ދާއިރާގެ ކުރީގެ މެމްބަރު އަލީ ރިޒާގެ މައްޗަށް އުފުލި ހިއުމަން ޓްރެފިކިންގެ ދައުވާ ކުރިޔަށް ނުގެންދިއުމެވެ. އަދި ބަނގުރަލާއި ގުޅޭ 77 މައްސަލައަކާއި އެއް ޖިންސުން ގުޅުން ހިންގުމާ ގުޅޭ 13 މައްސަލައެއް އަނބުރާ ގެންދިޔުން އަދި ވެންޓިލޭޓަރުގެ މައްސަލަ އެވެ.

ޝަމީމްގެ މައްޗަށް ވަނީ މުވައްޒަފުންގެ މެދުގައި ތަފާތު ކުރުން ގެންގުޅޭކަމަށް ވެސް ތުހުމަތުކޮށްފައެވެ.

ޝަމީމު މަގާމަށް ވަކިކުރުމަށް މިރޭ ޖަލްސާއެއް ބޭއްވުމަށް މަޖިލީހުން ވަނީ ނިންމާފައެވެ.