ޕްރޮސިކިއުޓާ ޖެނެރަލް (ޕީޖީ) ގެ މަގާމުން ހުސައިން ޝަމީމް ވަކިކުރަން ރައްޔިތުންގެ މަޖިލީހުން ފާސްކޮށް މަގާމުން ވަކި ކުރުމާއި ގުޅިގެން އެކަމުގެ އުފަލުގައި ގިނަ ބަޔަކު އުފާ ފާޅުކޮށް ކޭކު ފަޅައިފިއެވެ.

ލާދީނީ ޕްރޮޕެގަންޑާތަކާއި ދެކޮޅަށް އަޑު އުފުލަމުން އަންނަ އެމް.ވީ ނޫސް އެކައުންޓް އިން ވަނީ ޝަމީމް ވަކި ކުރުމާއި ގުޅިގެން އެކަމުގެ އުފަލުގައި އުފާ ފާޅުކޮށް ކޭކު ފަޅާފައިވާ ފޮޓޯ ޓްވިޓަރގައި އާންމުކޮށްފައެވެ.

ހުސައިން ޝަމީމު މަގާމުން ވަކިކޮށް، ވާނުވާ ބަންދު އުވައިލަން ގޮވައިލާ ގިނަ މުޒާހަރާތަކެއްވެސް ކޮށްފައިވެއެވެ. މިގޮތުން މި މުޒާހަރާތަކުގައި ޝަމީމަކީ ނިމިދިޔަ ސަރުކާރުގައި އެތަކެއް ލާއިންސާނީ އަމަލުތަކެއް ހިންގާފައިވާ ބޭފުޅުންނާ އެކު ޑީލް ހަދާފައިވާ ބޭފުޅެއް ކަމަށް ތުހުމަތުކޮށް، އޭނާގެ އިސްތިއުފާއަށް ގޮވާލައިފައިވެއެވެ.

މީގެ އިތުރުން، އޭނާއަކީ މޯލްޑިވްސް ޑިމޮކްރަސީ ނެޓްވޯކް (އެމްޑީއެން)އާ ގުޅުން އޮތް މީހެއް ކަމަށް ތުހުމަތުކޮށް، މުޒާހަރާގެ ބައިވެރިން ވަނީ އެފަދަ ބޭފުޅަކު ޕީޖީގެ މަގާމުގައި ބަހައްޓަން ބޭނުންނުވާ ކަމަށާއި އޭނާ އިސްތިއުފާ ދޭންޖެހޭ ކަމަށް ގޮވާލައިފައެވެ.

ޝަމީމް މަގާމުން ވަކިކުރަން މަޖިލީހުން ފާސްކުރިއިރު، އޭނާ ވަނީ އިސްތިއުފާ ދެއްވިކަން މީޑިއާއާ ހިއްސާ ކުރައްވައިފަ އެވެ. ނަމަވެސް، މަޖިލިހުގެ ޖަލްސާގައި، މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ، މަޖިލީހުގެ ވޯޓާ ހަމައަށް ދިޔައިރު އެ ސިޓީ ރައީސް އޮފީހަށް އަދި މަޖިލީހަށް ވެސް ލިބިފައި ނެތް ކަމަށެވެ.

ޝަމީމް ވަކިކުރަން މަޖިލީހުން ފާސްކުރީ 65 މެންބަރުންގެ ވޯޓާ އެކު އެވެ. ޝަމީމް ވަކިކުރަން ނުފެންނަ ކަމަށް ނުވަ މެންބަރަކު ވޯޓު ދެއްވިއިރު، ވަކި ކޮޅަކަށް ވޯޓު ނުދެއްވާ އެއް މެންބަރަކު އިންނެވި އެވެ.