ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރާގައި މިއަދު ބޯކޮށް ވާރޭވެހި 9 ރަށެއްގައި ފެންބޮޑުވެއްޖެއެވެ.

ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މަޢުލޫމާތު ދީފައިވާ ގޮތުގައި އިއްޔެއިން ފެށިގެން މުޅި ރާއްޖެއަށް މޫސުން ގޯސްވެ، ބޯކޮށް ވާރޭވެހެމުންދާއިރު މި ވިއްސާރައިގައި ރަށްރަށަށް ލިބެމުންދާ ގެއްލުންތައް ގާތުން ބަލަމުންދާ ކަމަށާއި، ހަވީރު 6:00 އާ ހަމައަށް ނުވަ ރަށަކުން ވައިގަދަވެ ފެންބޮޑުވުމުގެ ރިޕޯޓު ލިބިފައިވާކަމަށެވެ.

ނަމަވެސް މިހާތަނަށް އެއްވެސް ޢާއިލާއެއް ބަދަލުކުރަންޖެހޭ ފަދަ ހާލަތެއް މެދުވެރިވެފައި ނުވާ ކަމަށްވެސް ބުނެފައިވެއެވެ.

އެންޑީއެމްއޭއިން އެކްސްގައި ކުރި ޕޯސްޓުގައި ވަނި ފެން ބޮޑުވި ރަށްތަކުގެ މައުލޫމާތު ހިއްސާކޮށްފައެވެ. އެގޮތުން އެ ރަށްތަކުގެ ތެރޭގައި ހިމެނެނީ:

• ސ. މަރަދު

• ސ. ފޭދޫ

• ސ. ހިތަދޫ

• ގއ. ދެއްވަދޫ،

• ޅ. ނައިފަރު،

• ޅ. ކުރެންދޫ،

• ކުޅުދުއްފުށި ސިޓީ

• ހއ. ބާރަށް

• ހއ. ދިއްދޫ އެވެ.

އެންޑީއެމްއޭއިން އިތުރަށް ހާމަކޮށްފައިވާ ގޮތުގައި، . އެއްވެސް އާއިލާއެއް ބަދަލުކުރަންޖެހޭ ފަދަ ހާލަތެއް އަދި ނެތެވެ.

މޯލްޑިވްސް މީޓިއޮރޮލޮޖިކަލް ސަރވިސް (މެޓް) އިން ވަނީ ހއ. އަތޮޅުން ފެށިގެން ތ. އަތޮޅާ ހަމައަށް ޔެލޯ އެލާޓް ނެރެފައެވެ. މި އެލާޓް ދެމިއޮންނާނީ މިރޭ މެންދަމު 1:00 އާ ހަމައަށެވެ. މޫސުމަށް އަންނަމުންދާ ބަދަލުތަކާއެކު ރައްޔިތުން ސަމާލުވުމަށް އިދާރާތަކުން އިލްތިމާސްކޮށްފައިވެއެވެ.