ހެނދުނުން ފެށިގެން ހުއްޓުމެއްނެތި ވާރޭވެހެމުންދާއިރު މިރެއާ ހަމައަށް ބޯކޮށް ވާރޭވެހޭނެ ކަމަށް ލަފާކޮށް މޫސުމާ ބެހޭ ގައުމީ އިދާރާ (މެޓް) އިން މާލެ ސަރަހައްދަށް އޮރެންޖު އެލާޓު ނެރެފި އެވެ.

އޮރެންޖް އެލާޓް ނެރެފައި ވަނީ މިވަގުތުން ފެށިގެން އިރުއޮއްސި 6:15 އާ ހަމައަށްށެވެ.

އޮރެންޖު އެލާޓް ނެރުނީ މާލެ އަތޮޅުން ފެށިގެން ދ. އަތޮޅާ ހަމައަށް ކަމަށް ވެސް މެޓުން ވަނީ ބުނެފައެވެ.

އެ އިންޒާރުގައި މެޓުން ވަނީ މި ސަރަހައްދުތަކަށް ވާރޭވެހުމާއެކު ގުގުރާ ފެންބޮޑުވާނެ ކަމަށްވެސް ލަފާކޮށްފަ އެވެ.

ހެނދުނުން ފެށިގެން ހުއްޓުމެއްނެތި ވާރޭ ވެހެމުންދާތީ މާލޭގެ މަގުތަކުގައި ވަނީ ފެންބޮޑުވެފައެވެ.

އެމްއެންޑީއެފުން ބުނީ މާލޭގައި ފެންބޮޑުވެ ތިން ސަރަހައްދެއްގައި ފެން ހިންދުމަށް ޕަމްޕު ޖައްސައިގެން ސިފައިން ހަރަކާތްތެރިވަމުންދާ ކަމަށެވެ.

އެއީ ވެސްޓު ޕާކު ސަރަހައްދާއި އައިޖީއެމްއެޗް ސަރަަހައްދުގެ އިތުރުން މަޖީދީމަގުގެ އިރުމަތީ ސަރަހައްދެވެ.