މެދުނުކެނޑި ރާއްޖެ އަށް ކުރަމުންދާ ވިއްސާރައިގައި ވެރިރަށް މާލެ ސިޓީގެ 200 އަށް ވުރެ ގިނަ ގެއަށް ފެން ވަދެ ގެއްލުން ލިބިގެން ރިޕޯޓްކޮށްފައިވާ ކަމަށް ނެޝަނަލް ޑިޒާސްޓާ މެނޭޖުމަންޓް އޮތޯރިޓީން (އެންޑީއެމްއޭ) އިން ހާމަކޮށްފި އެވެ.

އެންޑީއެމްއޭ އިން މިކަން ހާމަކޮށްފައި ވަނީ އެކްސްގައި ކުރެއްވި ޕޯސްޓެއްގަ އެވެ.

އެންޑީއެމްއޭ އިން ބުނި ގޮތުގައި ފެންވަދެ ގެއްލުން ލިބިގެން މިރޭ ހަތެއް ޖެހުމާ ހަމައަށް އެ އޮތޯރިޓީއަށް ރިޕޯޓްކޮށްފައިވަނީ ޖުމުލަ 231 ގެއަކުންނެވެ.

މިރޭ އަށެއް ޖެހުމާ ހަމައަށް 252 އާއިލާއަކުން އެހީއަށް އެދިފައިވާ ކަމަށް ވެސް އެންޑީއެމްއޭން ވަނީ ބުނެފައެވެ.

އަދި ތިން އާއިލާއެއް ވަގުތީ ބޯހިޔާވަހިކަމަކަށް ބަދަލުކޮށްފައިވާ ކަމަށް ވެސް އެ އޮތޯރިޓީން ވަނީ ބުނެފައެވެ.

މިއަދު ހެނދުނުން ފެށިގެން މާލެ ސިޓީ އަށް ވެހެމުންދާ ވިއްސާރައިގައި މަގުތަކުގެ ފެންބޮޑުވެ، ފެން ހިންދުމުގެ މަސައްކަތް ވެސް އަންނަނީ ކުރަމުންނެވެ.