އިންޑިއާ ފަތުރުވެރިންގެ މާކެޓް ހަލާކުކޮށްލި ޑެޕިއުޓީ މިނިސްޓަރުން ތިބީ ބޮޑު މުސާރަ ދީފައިކަމަށް ކަނޑިތީމު ދާއިރާގެ މެމްބަރު އަމީން ފައިސަލް ވިދާޅުވެއްޖެ އެވެ.

އަމީން ފައިސަލް މިހެން ވިދާޅުވީ މިއަދު ރައްޔިތުންގެ މަޖިލިސްއަށް ހުށަހެޅި ޓޫރިސްޓް ރިޒޯޓު ހެދުމަށް ދޫކުރާ ރަށް ނުވަތަ ބިމުގެ މުއްދަތު 50 އަހަރަށްވުރެ އިތުރުނުވާނެ ގޮތަށް އިތުރުކުރަން ފައިސާ ދައްކަންޖެހޭ މުއްދަތު ކުރުކުރަން ދިވެހިރާއްޖޭގެ ޓޫރިޒަމާބެހޭ ގާނޫނަށް ހުށަހެޅި އިސްލާހަށް ބަހުސް ކުރައްވަމުންނެވެ.

އޭނާ ވިދާޅުވީ މި ސަރުކާރުގެ ޑެޕިއުޓީ މިނިސްޓަރުންތަކެއްގެ އަމަލުތަކުގެ ސަބަބުން އިންޑިއާ ފަތުރުވެރިންގެ މާކެޓް "ފުނޑާލި" ކަމަށެވެ.

އޭގެ ބަދަލުގައި އެ ޑެޕިއުޓީ މިނިސްޓަރުންނަށް ރިސޯޓް އޯނަރުން ދައްކާ ޓެކްސް ފައިސާއިން މުސާރަ ދެމުން ދާކަމަށް އޭނާ ވިދާޅުވި އެވެ.

އެހެންކަމުން އެއްކޮޅުން ޑިސްކައުންޓެއް ދީފައި އަނެއްކޮޅުން މި އަމަލު ހިންގި ފަރާތްތަކަށް މުސާރަ ދިނުމަކީ ދިވެހި ދައުލަތުން ޓެކްސް ދައްކާ ފަރާތްތަކަށް ކުރާ ފުރައްސާރައެއް ކަމަށް އޭނާ ވިދާޅުވި އެވެ.