މަޝްހޫރު ވިޔަފާރިވެރިޔާ، އަދި ރާއްޖެއަށް އިސްލާހީ ބަދަލުތައް ގެންނެވުމުގައި ފާހަގަކޮށްލެވުނު މުހައްމަދު ޒާހިރު (އޯކޭ ޒާހިރު) ނިޔާވެއްޖެއެވެ.
ޒާހިރު ނިޔާވެފައިވަނީ ހާލުބޮޑުވެގެން އައިސީޔޫގައި ފަރުވާދެމުންދަނިކޮށް އަވައްޓެރި ލަންކާގެ ހޮސްޕިޓަލެއްގައެވެ. ނިޔާވިއިރު އުމުރުފުޅަކީ 76 އަހަރެވެ. ޒާހިރު ނިޔާވީ ލަންކާގެ އާސީރީ ހޮސްޕިޓަލުގައި ފަރުވާދެމުން ދަނިކޮށް ފަތިހު ގާތްގަނޑަކަށް 04:30 ހާއިރުގައެވެ.
ދިވެހިންގެ ތެރޭގައި އޯކޭ ޒާހިރު މަޝްހޫރުވެގެން ދިޔައީ އޭނާގެ އީޖާދީ އުފެއްދުންތަކުގެ ސަބަބުންނެވެ. އައު އުފެއްދުންތައް ދިވެހިންގެ ތެރެއަށް ނެރުއްވުމުގައި ޒާހިރަކީ ނަމޫނާ ބޭފުޅެކެވެ. މިގޮތުން އޭނާ ވަނީ ކޮސްމެޓިކްސްގެ ބައެއް އުފެއްދުންތަކުގެ އިތުރުން މަސްވެރިކަމުގެ ދާއިރާގައިވެސް ފާހަގަކޮށްލެވޭ ފަދަ މަސައްކަތްތަކެއް ކުރައްވާފައެވެ. ޒާހިރު ވަނީ ރާއްޖެއިން ބޭރަށް ހުއިފިލަނޑާ ބޭރުކުރުމުގެ މަސައްކަތްވެސް ކުރައްވާފައެވެ.
ރާއްޖޭގެ އިޤްތިސާދަށް ފައިދާހުރި މަސައްކަތްތަކެއް ކޮށްދެއްވާފައިވާތީވެ ސަރުކާރުން ވަނީ ޒާހިރަށް 1993 ވަނަ އަހަރު ޤައުމީ އިނާމު ދެއްވާފައެވެ.
ރައްޖެއަށް ޒަމާނީ ޑިމިކްރަސީ އައުމުގައި ކުރެވުނު އިސްލާހީ މަސައްކަތްތަކުގައިވެސް ޒާހިރަކީ ޖެހިލުންކުޑަކަމާއެކު މަސައްކަތްކުރެއްވި ބޭފުޅެކެވެ.
