މާލެއަށް ކުރި ވިއްސާރައިގެ ސަބަބުން ގެދޮރަށް ގެއްލުންވެ ވަގުތީ ހިޔާތަކަށް ބަދަލު ކުރި މީހުންގެ ތެރެއިން އަދިވެސް ވަގުތީ ހިޔާގައި ދެ އާއިލާއެއް ތިބި ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީން (އެންޑީއެމްއޭ) އިން ބުނެފި އެވެ.
ވިއްސާރައިގައި ގެއްލުންވެ ވަގުތީ ހިޔާގައި ތިބި މީހުންގެ މައުލޫމާތު ހިއްސާކުރައްވަމުން އެންޑީއެމްއޭގެ އޮފިޝަލަކު ވިދާޅުވީ ދިރިނޫޅެވޭ ވަރަށް ގެއްލުންވި ފަަސް ގޭބިސީއަކަށް ވަގުތީ އެހީތެރިކަން ފޯރުކޮށްދިން ކަމަށެވެ. މީގެތެރެއިން ދެ އާއިލާއެއް މިހާރުވެސް ވަގުތީ ބޯހިޔަވަހިކަމުގައި ތިބި ކަމަށްވެސް ވިދާޅުވި އެވެ.
ވިއްސާރައިގައި ލިބުނު ގެއްލުން ދެނެގަތުމަށް ހަދާފައިވާ ރެޕިޑް އެސެސްމަންޓުން ބައެއް ގޭބިސީތަކުގައި ދިރިނޫޅެވޭވަރަށް ހާލަތު ގޯސްވެފައިވާ ކަމަށް އެނގިފައިވާ ކަމަށްވެސް އޮފިޝަލް ވިދާޅުވި އެވެ.
މީގެތެރެއިން ގިނަ ގޭބިސީތަކަކީ އާންމުކޮށް ވިއްސާރަވުމާ ގުޅިގެން ވަގުތީ އެހީތެރިކަން ފޯރުކޮށްދޭންޖެހޭ ފަދަ ނާޒުކު ހާލަތުގައި ހުރި ތަންތަން ކަމަށް އޮފިޝަލް ވިދާޅުވި އެވެ.
ރާއްޖޭގެ ބޮޑު ބަޔަކަށް މިމަހުގެ 11 ވަނަ ދުވަހުން ފެށިގެން ވާރޭވެހި ބޮޑެތި ގެއްލުންތަކެއް ލިބިފައިވާއިރު މިއަދު މޫސުން ތަންކޮޅެއް ރަނގަޅެވެ.
