މި ހަފުތާގައި ރާއްޖެއަށް މޫސުން ގޯސްވާނެ ކަމަށް މެޓް އޮފީހުން ލަފާކޮށްފައިވާތީ، ރައްކާތެރިވުމުގެ ފިޔަވަޅުތައް އަޅަން ނެޝަނަލް ޑިޒާސްޓަ މެނޭޖްމަންޓް އޮތޯރިޓީ (އެންޑީއެމްއޭ) އިލްތިމާސްކޮށްފިއެވެ.
މޫސުން ބަދަލުވާ ދުވަސްވަރާ ދިމާކޮށް ރާއްޖެ ކައިރީގައި ދެ ކޮޅިގަނޑު އުފެދެމުން ދާތީ، ކުރިއަށް އޮތް ދުވަސްތަކުގައި ރާއްޖޭގެ ހުރިހާ ހިސާބަކަށް މޫސުން ގޯސްވާނެ ކަމަށް މެޓް އޮފީހުން ބުނެފައިވާތީ ވައިގަދަވެ ވިއްސާރަވުމުން ލިބިދާނެ ގެއްލުންތަކުން ސަލާމަތްވާން ރައްކާތެރިކަމުގެ ފިޔަވަޅު އަޅަން އެންޑީއެމްއޭ އިން ވަނީ އިރުޝާދުދީފައެވެ. ވިއްސާރަވެ، ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުމަކީ ވެސް އެކަށީގެންވާ ކަމެއް ކަމަށް އެންޑީއެމްއޭ އިން ބުންޏެވެ.
އެ ފިޔަވަޅުތަކުގެ ތެރޭގައި؛
- ގެއަށް ފެން ނުވަންނަ ގޮތަށް ގޭގެ ދޮރުމަތީގައި ވެލި ބަސްތާ ޖެހުން
- ގޭތެރޭގައި ފެން ބޮޑުވެއްޖެ ނަމަ ގެއްލުން ވާނެ މުދާ އުސް ތަންތަނަށް ބަދަލުކުރުން
- ގަދަ ވަޔާ އެކު އެއްލާލަފާނެ ތަކެތި ބަނދެ ރައްކާތެރިކުރުން
- ކާޑުގެ ބާވަތްތަކާއި ޒަރޫރީ ތަކެއްޗަށް ދަތިނުވާނެ ގޮތަށް ދުރާލައި ކަންކަން ހަމަޖެއްސުން
ޑިޒާސްޓާ މެނޭޖްމަންޓު އޮތޯރިޓީން ވަނީ ދަތުރުކުރުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދައި މޫސުމަށް ސަމާލުކަން ދޭން އެދިފައެވެ.
ރާއްޖެއަށް މިހާރު ކުރަމުންދާ ވިއްސާރައިގައި ގިނަ ރަށްތަކެއްގައި ފެންބޮޑޫވެ ގެތަކަށް ފެންވަދެ ވަނީ ގެއްލުންތައް ލިބިފައެވެ.
