ރާއްޖޭގެ ބޮޑު ސަރަހައްދުތަކަށް ވައިޓް އެލާޓް ނެރެފިއެވެ.

މޫސުމާ ބެހޭ ގައުމީ އިދާރާއިން ވައިޓް އެލާޓް ނެރެފައިވަނީ ހއ އަތޮޅުން ފެށިގެން ވ އަތޮޅާ ހަމައަށް އަދި އދ އަތޮޅުން ފެށިގެން ލ އަތޮޅާ ހަމައަށެވެ.

ހއ އިން ވ އަތޮޅަށް ވައިޓް އެލާޓް ނެރެފައިވަނީ މިއަދު ހެނދުނު 7 އިން މެންދުރު 1 އާ ހަމައަށެވެ. އެ ގަޑިތަކުގައި އެ ސަރަހައްދުތަކަށް ގަޑިއަކު 19-24 މޭލުގެ ބާރުމިނުގައި ވައިޖެހޭނެކަމަށް ބެލެވެއެވެ. ވިލާގަނޑުން ވައިޖެހޭނެކަމަށް ލަފާކުރެވެނީ ގަޑިއަކު 45 މޭލުގެ ބާރުމިނުގައެވެ. އަދި ކަނޑުތައް ގަދަވާނެކަމަށްވެސް މެޓް އޮފީހުން ބުނެފައިވެއެވެ.

އދ އިން ލ އަތޮޅާ ހަމައަށް ނެރެފައިވާ ވައިޓް އެލާޓްގެ މުއްދަތަކީ މިއަދު ހެނދުނު 7 އިން މެންދުރު 12 އާ ހަމައަށެވެ. މި ސަރަހައްދުގައި ބޯކޮށް ވާރޭވެހި، ގުގުރުމާއެކު ވިލާގަނޑުގައި ގަޑިއަކު 45 މޭލުގެ ބާރުމިނުގައި ވައިޖެހޭނެކަމަށް ބެލެވެއެވެ.

މާދަމާގެ މޫސުމަށް ބަލާއިރު، ހުޅުލެ އާއި ހަނިމާދޫއަށް އާދައިގެ ވަރަކަށް ވާރޭވެހޭނެކަމަށް ލަފާކުރެވޭއިރު، ކައްދޫ، ކާޑެއްދޫ އަދި ގަމަށް ތުނިކޮށް ވާރޭވެހޭނެކަމަށް މެޓް އޮފީހުން ލަފާކޮށްފައިވެއެވެ.

ބޯކޮށް ވަރޭ ވެހި، ވިލާގަނޑުގައި ކަނޑުތައް ގަދަވާނެ ކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަަމާލުވުމަށް މެޓު އޮފީހުން އިލްތިމާސްކޮށްފައިވެސް ވެއެވެ. އަދި ކަނޑު ދަތުރުކުރާ ފަރާތްތަކުން ދަތުރު ފެށުމުގެ ކުރިން އެންމެ ފަހުގެ މޫސުމީ މައުލޫމާތު ހޯދައިގެން ދަތުރު ކުރުމަށް އަންގާފައި ވެއެވެ.

ރާއްޖެއަށް މިހާރު ކުރަމުން ދާ ހުޅަނގު މޫސުމުގެ ވިއްސާރައިގެ ބާރު ގަދަވެ ފާއިތުވި ހަފްތާއެއް ހާ ދުވަހު ވަނީ މުޅި ރާއްޖެއަށް ވިއްސާރަކޮށް ވެހުނު ވާރޭގެ ސަބަބަުން ބޮޑެތި ގެއްލުންތައް ވެސް ވެފައެވެ.