މިހާރު ކުރަމުންދާ ވިއްސާރައިގައި އިއްޔެ އެންމެ ބޯކޮށް ވާރޭވެހުނީ ލ. ކައްދޫއަށް ކަން ހާމަވެއްޖެއެވެ.

މޫސުމާ ބެހޭ ގައުމީ އިދާރާ (މެޓު) އޮފީހުން އާންމުކުރި ތަފާސްހިސާބުތައްކުން ދައްކާ ގޮތުގައި އިއްޔެ ހެނދުނު 8:00 އިން މިއަދު ހެނދުނު 8:00 އަށް ރާއްޖޭގެ އެކި ކަންކޮޅުތަކަށް ވާރޭވެހިފައިވާ އަދަދުތަކަށް ބަލާއިރު އެންމެ ބޯކޮށް ވާރޭ ވެހުނު ކަމަށް ރެކޯޑު ކުރެވުނީ ކައްދޫއަށެވެ. އެގޮތުން ކައްދޫއަށް 34.8 މިލިމީޓަރުގެ ވާރޭވެހުނެވެ.

ދެން އެންމެ ބޯކޮށް ވާރޭވެހުން ކަމަށް ތަފާސްހިސާބުތަކުން ދައްކަނީ ބ. ދަރަވަންދޫއަށެވެ. އެ ރަށަށް 25.5 މިލިމީޓަރުގެ ވާރޭވެހިފައިވެއެވެ. އަދި ތިން ވަނައަށް އެންމެ ބޯކޮށް ވާރޭ ވެހުނީ އދ. މާމިގިއްޔަށާއި ފ. ނިލަންދޫއަށެވެ. އެ ދެ ރަށަށް 25 މިލިމީޓަރުގެ ވާރޭވެހިފައިވާ ކަމަށް މެޓްގެ ތަފާސްހިސާބުތަކުން ދައްކައެވެ.

ބޯކޮށް ވަރޭ ވެހި، ވިލާގަނޑުގައި ކަނޑުތައް ގަދަވާނެ ކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަަމާލުވުމަށް މެޓު އޮފީހުން އިލްތިމާސްކޮށްފައިވެސް ވެއެވެ. އަދި ކަނޑު ދަތުރުކުރާ ފަރާތްތަކުން ދަތުރު ފެށުމުގެ ކުރިން އެންމެ ފަހުގެ މޫސުމީ މައުލޫމާތު ހޯދައިގެން ދަތުރު ކުރުމަށް އަންގާފައި ވެއެވެ.

ރާއްޖެއަށް މިހާރު ކުރަމުން ދާ ހުޅަނގު މޫސުމުގެ ވިއްސާރައިގެ ބާރު ގަދަވެ ފާއިތުވި ހަފްތާއެއް ހާ ދުވަހު ވަނީ މުޅި ރާއްޖެއަށް ވިއްސާރަކޮށް ވެހުނު ވާރޭގެ ސަބަބަުން ބޮޑެތި ގެއްލުންތައް ވެސް ވެފައެވެ.