ސަރުކާރު އޮތީ "އެލް" ބޯޑްގައި ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

އުމަރު މިފަދައިން ވިދާޅުވެފައިވަނީ މެޑިކަލް އިވެކުއޭޝަންތަަކަށް ހާއްސަކުރި ސީ ޕްލޭން މިހާރު އާންމު ދަތުރުތަކަށް ބޭނުން ކުރަން ފަށާފައިވާތީ އެކަމާ ގުޅިގެން ފޭސްބުކްގައި ކުރެއްވި ޕޯސްޓެއްގައެވެ.

އުމަރު ވިދާޅުވީ މިވާ ގޮތެއް އެނގިވަޑައިނުގަތް ކަމަށާއި ފެންނަނީ ސަރުކާރު "އެލް" ބޯޑްގައި މަސައްކަތްކުރާ ތަން ކަމަށެވެ. އަދި އެއިން ބޯޓެއްގެ ދަވާދު ބަދަލުކޮށްލައި އިންޓީރިއާ ބަދަލުކޮށްލުމަކީ އާދައިގެ ކުޑަ ޚަރަދެއް ނޫންކަމަށް ވިދާޅުވެ އުމަރު ވަނީ އެ ޚަރަދުތައް މިހާރު އެވީ ވަރަށް ބައިވަރު އިސްރާފަށްކަންވެސް ފާހަގަކުރައްވާފައެވެ.

އެއާރ އެމްބިއުލާންސާއި ސީ އެމްބިއުލާންސްގެ ހިދުމަތް މި ސަރުކާރުން މި އަހަރުގެ ކުރީކޮޅު ފެށީ ގައުމީ އެއާލައިން މޯލްޑިއަން މެދުވެރިކޮށެވެ. އެގޮތުން އެ ހިދުމަތްތަކަށް ބޯޓުތަކެއް ބޭނުން ކުރަން ފެށީ ބޮޑެތި ބަދަލުތަކެއް ވެސް ގެނައުމަށް ފަހުއެވެ. ސީ އެމްބިއުލާންސްގެ ހިދުމަތް ލޯންޗްކުރީ މާޗް 15 ގައެވެ.

ނަމަވެސް އެ ބޯޓަށް ބަދަލުތައް ގެނެސް އަލުން މިހާރު ވަނީ ޓޫރިސްޓުން އުފުލަން ފަށައިފަ އެވެ.

އެއާރ އެމްބިއުލޭންސެއް ގޮތުގައި ހަމަޖައްސައި ބަލި މީހުން އުފުލަން ހާއްސަ ކުރި މޯލްޑިވިއަންގެ ސީޕްލޭނުގެ ކުލަ ބަދަލުކޮށް ރިސޯޓުތަކަށް ފަތުރުވެރިން އުފުލަން ފެށީ، އެ ސީޕްލޭން މެދުވެރިކޮށް މީހުން އުފުލަން ޖެހޭ ވަރު މަދުވުމުން ކަމަށް ޓްރާންސްޕޯޓު މިނިސްޓަރު ކެޕްޓަން މުހައްމަދު އަމީން ވަނީ ވިދާޅުވެފައެވެ.


މިދިޔަ ފަސް މަހުގެ ތެރޭ ސީޕްލޭނުގައި ބަލިމީހުން އުފުލުމަށް އޮތް ޑިމާންޑު ވަރަށް ބޮޑަށް ދަށްވެފައިވާ ކަމަށާ އަދި ބައެއް މަސްމަހު ބަލި މީހަކު ގޮވައިގެން އެއްވެސް ދަތުރެއް ނުކުރާ ކަމަށްވެސް މިނިސްޓަރު ވަނީ އިއުތިރާފުވެފައެވެ.