ގޯތިތައް ހަވާލުކުރުން އަވަސްކުރުމަށް ގޮވާލަން ރައްޔިތުންނާއެކު މަޖިލިސް މެމްބަރުން ނުކުތުމަށް ދައުވަތު އަރުވައިފިއެވެ.

މި ދައުވަތު އަރުވާފައިވަނީ ގިރާވަރު މާލެ ސިޓިޒެން އެސޯސިއޭޝަންގެ ފަރާތުންނެވެ.

އެ އެސޯސިއޭޝަންގެ ރައީސް އިބްރާހިމު ޝިޔާޒް ސޮއިކުރައްވާ ރައްޔިތުންގެ މަޖިލީހުގެ މެމްބަރުންނަށް ފޮނުވި ސިޓީގައި ވިދާޅުވެފައިވަނީ މި ފަހަކަށް އައިސް މަޖިލިސް ތަޅުމުގައި ބިންވެރިޔާ ސްކީމުން ދޫކޮށްފައި ހުރި ބިންތައް އެއީ ދޭން ޖެހޭ ތަންތަން ނޫން ކަމަށާ އެތަންތަން ފޭރިގަންނަ ޖެހޭ ކަމަށް މަޖިލިސް މެމްބަރުން ވިދާޅުވަމުން ގެންދަވާކަން ފާހަގަކުރެވޭ ކަމަށެވެ. އެގޮތުން ވެލިދޫ ދާއިރާގެ މެމްބަރު މުހައްމަދު އައްބާސް ހޯމަ ދުވަހުގެ ޖަލްސާގައި ދެއްކެވި ވާހަކަތަކަށް އިޝާރާތްކުރައްވާފައިވެއެވެ.

މާލެއަށް ނިސްބަތްވާ ބައެއް އިއްޒަތްތެރި މެމްބަރުން ވެސް ހިމެނޭހެން، އެ ގޯތިތައް އަތުލުމަށް ސަރުކާރަށް ތާއީދުކުރާ އަދި ސަރުކާރު ތަމްސީލު ކުރާ މެމްބަރުން މަސައްކަތްކޮށް އަދި އެއީ ޚިޔާނާތެއްގެ ގޮތުގައި ވެސް ބައެއް މެމްބަރުން ސިފަކުރަމުން ދާކަމަށާ އެކަންކަން ހަރުކަށި އިބާރާތުން ކުށްވެރިކުރާ ކަމަށްވެސް ސިޓީގައި ބަޔާންކޮށްފައިވެއެވެ.

އެހެންކަމުން ގޮތިތައް ނުދީ ހިފަހައްޓާ ހިފެހެއްޓުމާ ދެކޮޅަށާ ގޯތިތައް ނުދީ ވާނެ ގޮތެއް އޮތްތޯ ބެލުމަށް މަޖިލީހުގެ ބައެއް މެމްބަރުން ކުރަމުންދާ މަސައްކަތްތަކާ ދެކޮޅަށް މަޖިލިސް މެމްބަރުން އެ ބޭފުޅުންނާ އެކު މައިދާނަށް ނުކުތުމަށް، ބިންވެރިޔާ ސްކީމުގެ ދަށުން ގޯތި ލިބުނު ހުރިހާ ފަރާތްތަކުގެ ނަމުގައި ގިރާވަރު މާލެ ސިޓިޒެން އެސޯސިއޭޝަނުން ވަނީ މަޖިލިސް މެމްބަރުން އަރިހުން އެދިފައެވެ.

މިފަދަ ސިޓީއެއް މަޖިލިސް މެމްބަރުންނަށް ފޮނުވާފައިވާއިރު، ގުޅީފަޅު ސިޓިޒެންސް އެސޯސިއޭޝަނުން ވަނީ ގޯތި ދިނުން ލަސްކުރުމާ ދެކޮޅަށް ކުރާ މަސައްކަތް ކުރާތީ މުޒާހަރާއަށް ނުކުތުމަށް ނިންމާފައެވެ.

މި ސަރުކާރުގައި ގޯތި އަތުނުލާނެ ކަމަށް ރައީސް މުހައްމަދު މުއިއްޒު ވިދާޅުވި ނަމަވެސް ގޯތިތައް ނުދީ ދަނީ ހިފަަހައްޓާ ލަސްކުރަމުންކަން ފާހަގަކޮށްލެވެއެވެ. މިކަމާ ގުޅިގެން ގޯތި ލިބުނު ފަރާތްތަކުން ދަނީ އެތައް ކަންބޮޑުވުމެއް ފާޅުކުރަމުންނެވެ.